మెడనొప్పి : కారణాలు, లక్షణాలు, చికిత్స, నివారణ

మనలో చాలామంది ప్రస్తుతం డెస్క్ జాబ్స్ చేస్తున్నారు. వారిలో కొంతమందికి మెడనొప్పి తరచుగా వస్తున్న సమస్య. అయితే మెడ నొప్పి అనేది కేవలం డెస్క్ జాబ్స్ చేస్తున్న వారిలో మాత్రమే కాకుండా ఎవరిలో అయినా రావచ్చు. అయితే మెడనొప్పి వచ్చిన వెంటనే దానికి కారణాలు తెలుసుకుని సరైన చికిత్స చేయించుకోవడం వలన త్వరగా తగ్గే అవకాశం ఎక్కువగా ఉంది. అయితే మెడనొప్పిని నిర్లక్ష్యం చేయడం వలన మెడనొప్పి మరింత తీవ్రతరంగా మారే ప్రమాదం ఉంది, అంతేకాకుండా దీని వలన భుజం నొప్పి, నడుము నొప్పి కూడా కలగవచ్చు. మెడనొప్పి రెండు లేదా మూడు రోజులపాటు తగ్గకపోతే తప్పనిసరిగా డాక్టర్ ను సంప్రదించాలి. అయితే మెడనొప్పి ఎందుకు వస్తుంది? ఈ సమస్యకు ఎలాంటి చికిత్స చేస్తారు అనే విషయాలతో పాటుగా పూర్తికి సమాచారం ఇక్కడ తెలుసుకుందాం.

మెడ నొప్పికి ప్రధాన కారణాలు

మెడ నొప్పి రావడానికి అనేక కారణాలు ఉన్నాయి. చాలా సందర్భాలలో, ఇది తీవ్రమైన సమస్య కాకపోయినా, మెడ నొప్పికి కారణాలను వివరంగా అర్థం చేసుకోవడం నివారణ మరియు చికిత్సకు సహాయపడుతుంది.

• టెక్స్ట్ నెక్ సిండ్రోమ్(Text Neck Syndrome): మొబైల్ ఫోన్‌లు, టాబ్లెట్‌లు లేదా ల్యాప్‌టాప్‌లను చూసేటప్పుడు తల వంచుకుని ఎక్కువసేపు గడపడం వల్ల ఈ సమస్య వస్తుంది. సాధారణంగా తల బరువు 4.5 నుండి 5.5 కిలోలు ఉంటుంది. తలను కేవలం 15 డిగ్రీలు ముందుకు వంచితే, మెడ వెనుక కండరాలు మరియు స్నాయువులపై పడే భారం సుమారు 12 కిలోలకు పెరుగుతుంది. ఈ నిరంతర ఒత్తిడి వల్ల కండరాలు అతిగా సాగి, బలహీనపడతాయి. దీర్ఘకాలికంగా ఇలా జరగడం వలన మెడనొప్పి వస్తుంది.
• కంప్యూటర్ ముందు కూర్చునే విధానం: కుర్చీలో ముందుకు జారి, స్క్రీన్ కిందికి చూస్తూ పనిచేయడం. దీనివల్ల భుజాలు ముందుకు వంగి, మెడ ముందుకు సాగిపోతుంది. ఈ సిట్టింగ్ పోష్చర్ వల్ల మెడ మరియు పై వీపు కండరాలలో దీర్ఘకాలికంగా గట్టిదనం ఏర్పడుతుంది, దీనివలన మెడనొప్పి రావచ్చు.
• నిద్రించే విధానం: చాలా ఎత్తైన లేదా గట్టి దిండు ఉపయోగించడం మెడ యొక్క సహజమైన వంపుకు ఆధారం ఇవ్వకుండా, మెడ వంకరగా ఉండేలా చేస్తాయి. దీని ఫలితంగా ఉదయం లేవగానే మెడ పట్టేసినట్లు అవుతుంది. ఈ పరిస్థితిని స్టిఫ్ నెక్ అంటారు.
• మానసిక ఒత్తిడి : ఆందోళన, కోపం లేదా అధిక ఒత్తిడిలో ఉన్నప్పుడు మెడ మరియు భుజాల కండరాలు అసంకల్పితంగా బిగుసుకుపోతాయి. ఈ కండరాల సంకోచం (Contraction) చాలా గంటలు లేదా రోజులు కొనసాగితే, అది నొప్పిగా మారుతుంది. ఇది తరచుగా టెన్షన్ హెడేక్స్‌కు కూడా దారితీస్తుంది.
• శారీరక ఒత్తిడి: బరువులు ఎత్తేటప్పుడు సరైన పద్ధతిని పాటించకపోవడం, లేదా వ్యాయామం చేసేటప్పుడు మెడను అతిగా తిప్పడం వల్ల కండరాలు బెణకడం లేదా చిట్లడం జరగవచ్చు.
• విప్లాష్ (Whiplash): కారు ప్రమాదాలు లేదా ఆటలలో తల అకస్మాత్తుగా, అతి వేగంగా వెనక్కి, ముందుకు కదలడం వల్ల మెడలోని కండరాలు మరియు స్నాయువులు దెబ్బతింటాయి. నొప్పి కొన్ని గంటల తర్వాత లేదా కొన్ని రోజుల తర్వాత మొదలవ్వవచ్చు.
• సర్వైకల్ స్పాండిలోసిస్ (Cervical Spondylosis): దీనినే మెడ వెన్నెముక అరుగుదల అని కూడా అంటారు. వెన్నెముకలోని డిస్క్‌లు (Discs) ఎండిపోయి, వాటి ఎత్తు తగ్గిపోతాయి. దీని ఫలితంగా, ఎముక అంచుల్లో చిన్న చిన్న పెరుగుదలలు (బోన్ స్పర్స్) ఏర్పడతాయి. ఈ మార్పుల వల్ల మెడ కదలిక తగ్గుతుంది మరియు దీర్ఘకాలిక నొప్పిని కలిగిస్తుంది.
• డిస్క్ హెర్నియేషన్ (Disk Herniation): వెన్నెముకలోని డిస్క్‌లు షాక్ అబ్జార్బర్‌ల మాదిరిగా పనిచేస్తాయి. వయస్సు పెరిగే కొద్దీ లేదా గాయం వల్ల ఈ డిస్క్‌లు చిట్లిపోయి, వాటిలోని గుజ్జు లాంటి పదార్థం బయటకు వస్తుంది. ఈ ఉబ్బిన భాగం ప్రక్కనే ఉన్న నరాలపై ఒత్తిడి కలిగించవచ్చు. దీనివల్ల మెడ నొప్పి భుజం, చేయి లేదా వేళ్ల వరకు నొప్పి కలగవచ్చు.
• ఆస్టియో ఆర్థరైటిస్ (Osteoarthritis): మెడలోని కీళ్ల కార్టిలేజ్ అరిగిపోవడం వలన ఎముకలు ఒకదానిపై ఒకటి రాసుకునేలా చేసి, నొప్పి, వాపు మరియు మెడ కండరాలు గట్టిపడతాయి, దీని వలన మెడనొప్పి వస్తుంది.
• రుమటాయిడ్ ఆర్థరైటిస్ (Rheumatoid Arthritis): ఇది ఒక రకమైన కీళ్ల వ్యాధి, దీనివల్ల మెడలోని కీళ్ల వాపు మరియు నొప్పి వస్తుంది.
• మెనింజైటిస్: మెదడు మరియు వెన్నుపామును కప్పి ఉంచే పొరల వాపు. ఈ పరిస్థితి ఉన్నవారిలో, మెడ నొప్పి చాలా తీవ్రంగా ఉంటుంది, మరియు ఇది తరచుగా జ్వరం, తీవ్రమైన తలనొప్పి మరియు వెలుతురును చూడలేకపోవడం వంటి లక్షణాలతో కూడి ఉంటుంది. ఇది అత్యవసర వైద్య పరిస్థితి, ఈ సమస్యకు వెంటనే చికిత్స అందించకపోతే పేషేంట్ ప్రాణాలు కోల్పోయే ప్రమాదం ఉంది.
• ఇన్ఫెక్షన్లు లేదా కణితులు: వెన్నెముక లేదా మెడలోని కణజాలాలలో ఇన్ఫెక్షన్లు (ఉదా: ఆస్టియోమైలిటిస్) లేదా అరుదైన కణితులు నరాలపై ఒత్తిడి కలిగించడం వలన కూడా మెడనొప్పి కలగవచ్చు.

మెడ నొప్పి లక్షణాలు

మెడ నొప్పి లక్షణాలు ఒక్కొక్క వ్యక్తిలో ఒక్కో విధంగా ఉండవచ్చు. నొప్పి యొక్క తీవ్రత, అది మొదలైన కారణాన్ని బట్టి ఈ లక్షణాలు మారుతుంటాయి. మెడనొప్పి ఉన్నవారిలో కేవలం నొప్పి మాత్రమే కాకుండా మరికొన్ని లక్షణాలు కూడా కనిపించవచ్చు.

• దీర్ఘకాలిక నొప్పి : మెడ యొక్క ఒకే ప్రాంతంలో నొప్పి కేంద్రీకృతమై ఉంటుంది. కొన్నిసార్లు ఇది మెడ వెనుక లేదా భుజం పైభాగానికి కొద్దిగా విస్తరించవచ్చు.
• గట్టిదనం (స్టిఫ్ నెక్) : మెడ కదపడానికి ఇబ్బందిగా ఉంటుంది. ముఖ్యంగా ఉదయం నిద్ర లేచిన వెంటనే మెడను అటు ఇటూ లేదా పైకి, కిందికి తిప్పడానికి చాలా కష్టంగా, బిగుసుకుపోయినట్లు అనిపిస్తుంది. దీనినే ‘స్టిఫ్ నెక్’ అంటారు.
• కండరాల నొప్పులు : మెడ మరియు భుజాల చుట్టూ ఉన్న కండరాలను నొక్కినప్పుడు లేదా తాకినప్పుడు నొప్పిగా ఉంటుంది. ఈ కండరాలు గట్టిగా, బిగుసుకుపోయినట్లు అనిపిస్తాయి.
• తల తిప్పలేకపోవడం : తలను పూర్తిగా ఒక పక్కకు తిప్పలేకపోవడం లేదా వెనక్కి వంచలేకపోవడం. మెడను కదిపితే నొప్పి ఎక్కువవుతుంది.
• తల నొప్పి : మెడ వెనుక భాగంలో మొదలై, నెమ్మదిగా తల వెనుకకు లేదా నుదుటి వైపుకు నొప్పి కలగవచ్చు.ఇది సాధారణంగా టెన్షన్ హెడేక్ లేదా సర్వైకోజెనిక్ హెడేక్ కావచ్చు.
• భుజం మరియు చేతుల నొప్పి : నొప్పి కేవలం మెడకే పరిమితం కాకుండా, భుజం గుండా చేయి, ముంజేయి మరియు వేళ్ల వరకు కూడా కలగవచ్చు. ఈ పరిస్థితిని రేడికులోపతి అంటారు.
• తిమ్మిరి లేదా జలదరింపు : నరంపై ఒత్తిడి పడటం వల్ల ప్రభావితమైన చేయి లేదా వేళ్లలో తిమ్మిరి లేదా సూదులతో గుచ్చినట్లుగా జలదరింపు అనుభూతి కలుగుతుంది.
• కండరాల బలహీనత : నరం పూర్తిగా ఒత్తిడికి గురైనప్పుడు, చేయి లేదా పట్టు బలహీనపడవచ్చు. వస్తువులను పట్టుకోవడానికి లేదా బరువులు ఎత్తడానికి కష్టంగా అనిపించవచ్చు.
• నరాల లాగడం: మెడను ఒక నిర్దిష్ట దిశలో తిప్పినప్పుడు లేదా వంచినప్పుడు, చేయి లేదా భుజంలో విద్యుత్ షాక్ కొట్టినట్లుగా నొప్పి కలగడం.
• తీవ్ర జ్వరంతో నొప్పి: మెడ నొప్పి జ్వరం, తీవ్రమైన తలనొప్పి మరియు వెలుతురును చూడలేకపోవడంతో (ఫోటోఫోబియా) కూడి ఉంటే, అది మెనింజైటిస్ వంటి తీవ్రమైన ఇన్ఫెక్షన్ కావచ్చు.
• శరీరంలోని మార్పు: మెడ నొప్పితో పాటు, కాళ్లలో బలహీనత, నడవడంలో సమన్వయం కోల్పోవడం లేదా మలమూత్ర విసర్జనపై నియంత్రణ కోల్పోవడం. ఇది వెన్నుపాముపై ఒత్తిడి సంకేతం కావచ్చు.

మెడనొప్పి చికిత్స

మెడ నొప్పికి చికిత్స అనేది ఆ నొప్పి యొక్క కారణం, తీవ్రత మరియు లక్షణాలపై ఆధారపడి ఉంటుంది. చాలా సందర్భాలలో, తగినంత విశ్రాంతి మరియు సాధారణ చికిత్సల ద్వారా ఉపశమనం పొందవచ్చు. అయితే మెడనొప్పి తీవ్రంగా ఉంటే వైద్యులను సంప్రదించడం అవసరం.

మెడ నొప్పికి సంబంధించిన చికిత్సా పద్ధతులు ఇక్కడ వివరంగా తెలుసుకోవచ్చు:

విశ్రాంతి : మెడ నొప్పి తీవ్రంగా ఉన్న మొదటి 2-3 రోజులు మెడకు అధిక శ్రమ ఇవ్వకుండా విశ్రాంతి ఇవ్వడం ముఖ్యం. అయినప్పటికీ, ఎక్కువ కాలం పూర్తిగా విశ్రాంతి తీసుకోవడం వల్ల కండరాలు మరింత బిగుసుకుపోతాయి, కాబట్టి సాధారణ కదలికను కొనసాగించాలి.

ఐస్ ప్యాక్ మరియు హీటింగ్ ప్యాడ్ : మెడనొప్పి ఉన్నప్పుడు మొదటి 48 గంటలు నొప్పి లేదా వాపు ఉన్న ప్రాంతంలోఐస్ ప్యాక్ పెట్టడం వల్ల వాపు తగ్గుతుంది.48 గంటల తర్వాత హీటింగ్ ప్యాడ్ లేదా వేడి నీటి స్నానం ఉపయోగించడం వల్ల కండరాలు రిలాక్స్ అవుతాయి మరియు రక్త ప్రసరణ మెరుగుపడుతుంది.

సరైన నిద్ర భంగిమ : చాలామంది నిద్రించే సమయంలో ఎత్తు ఎక్కువగా ఉన్న దిండ్లను ఉపయోగిస్తారు. దీనివలన మెడనొప్పి మరింత తీవ్రంగా మారే ప్రమాదం ఉంది. అయితే మెడనొప్పి తగ్గడానికి దిండు లేకుండా నిద్రించడం మంచిది లేదా పలుచని లేదా ఆర్థోపెడిక్ దిండును ఉపయోగించవచ్చు.

స్ట్రెచింగ్ : మెడను నెమ్మదిగా పక్కలకు, పైకి, కిందికి వంచడం ద్వారా గట్టిపడిన కండరాలను సడలించడం.

వ్యాయామం : మెడ కండరాలను బలోపేతం చేయడానికి నిపుణుడి పర్యవేక్షణలో కొన్ని వ్యాయామాలు చేయడం. ఇది భవిష్యత్తులో నొప్పి రాకుండా నిరోధించడానికి సహాయపడుతుంది. దీర్ఘకాలిక నొప్పి మరియు కదలిక పరిమితి ఉన్నవారికి ఫిజియోథెరపీ అత్యంత ప్రభావవంతమైన చికిత్స.

మాన్యువల్ థెరపీ : ఫిజియోథెరపిస్ట్ చేతులు ఉపయోగించి కండరాలను మసాజ్ చేయడం మరియు వెన్నెముక కీళ్ల కదలికను మెరుగుపరచడం ద్వారా మెడనొప్పిని తగ్గించవచ్చు.

ట్రాక్షన్ : మెడ వెన్నెముక మధ్య ఖాళీని పెంచడానికి, నరాలపై ఒత్తిడిని తగ్గించడానికి ఒక ప్రత్యేక పరికరం ఉపయోగించి మెడకు సున్నితమైన లాగుడు ఇవ్వడం.
మందులు : నొప్పి మరియు వాపును తగ్గించడానికి ఇబుప్రోఫెన్ (Ibuprofen) వంటి నాన్-స్టెరాయిడల్ యాంటీ ఇన్ఫ్లమేటరీ డ్రగ్స్ (NSAIDs) ను డాక్టర్ లేదా ఫార్మసిస్ట్ సలహా మేరకు ఉపయోగించవచ్చు.

• కండరాల సడలింపు మందులు (Muscle Relaxants): కండరాలు అతిగా బిగుసుకుపోయి, నొప్పికి కారణమవుతున్నప్పుడు, వాటిని సడలించడానికి ఈ మందులు ఇస్తారు.
• సర్వైకల్ కాలర్ (Cervical Collar): తీవ్రమైన నొప్పి లేదా గాయం అయినప్పుడు మెడ కండరాలకు మరియు వెన్నెముకకు తాత్కాలికంగా సపోర్ట్ ఇవ్వడానికి ఇది ఉపయోగపడుతుంది. దీనిని ఎక్కువ కాలం వాడటం మంచిది కాదు, ఎందుకంటే కండరాలు బలహీనపడతాయి.
• కోర్టికోస్టెరాయిడ్ ఇంజెక్షన్లు: నరాలపై తీవ్రమైన వాపు మరియు ఒత్తిడి ఉన్నప్పుడు, ఆ ప్రాంతంలో నేరుగా స్టెరాయిడ్ మందును ఇంజెక్ట్ చేయడం వల్ల నొప్పి త్వరగా తగ్గుతుంది.
• ట్రిగ్గర్ పాయింట్ ఇంజెక్షన్లు: నొప్పి ఎక్కువగా ఉన్న కండరాల గడ్డలలో (Trigger Points) మందులు ఇవ్వడం.
• శస్త్రచికిత్స : మెడ నొప్పికి శస్త్రచికిత్స అనేది సాధారణంగా చివరి ప్రయత్నం. డిస్క్ హెర్నియేషన్ కారణంగా నరంపై తీవ్రమైన ఒత్తిడి ఉండి, అది చేతుల్లో బలహీనత లేదా తిమ్మిరిని కలిగిస్తుంటే, ఎముక స్పర్స్ లేదా డిస్క్ కారణంగా వెన్నుపాముపై ఒత్తిడి ఉంటే మరియు మెడనొప్పి మరే ఇతర చికిత్సకూ తగ్గకపోతే డాక్టర్లు శస్త్రచికిత్సను సూచించవచ్చు.

మీకు మెడ నొప్పి ఉంటే, మీ లక్షణాలకు ఏ చికిత్స ఉత్తమమో తెలుసుకోవడానికి ఆర్థోపెడిక్ నిపుణులను సంప్రదించడం చాలా అవసరం.

మెడనొప్పి రాకుండా తీసుకోవాల్సిన జాగ్రత్తలు

మెడ నొప్పి రాకుండా నివారించడానికి, ముఖ్యమైన జాగ్రత్తలు మరియు నివారణ మార్గాలు ఇక్కడ వివరంగా ఉన్నాయి.

కంప్యూటర్ వాడే సమయంలో తీసుకోవాల్సిన జాగ్రత్తలు

• స్క్రీన్ ఎత్తు సర్దుబాటు: కంప్యూటర్ మానిటర్ మీ కంటి స్థాయిలో ఉండేలా చూసుకోండి. దీనివల్ల మీరు తలను ముందుకు వంచకుండా లేదా వెనక్కి ఎత్తకుండా, నిటారుగా కూర్చోగలుగుతారు. దీనికి ల్యాప్‌టాప్ స్టాండ్‌లు లేదా మానిటర్ ఎలివేటర్‌లు ఉపయోగించవచ్చు.
• బ్యాక్ సపోర్ట్ : కుర్చీలో కూర్చున్నప్పుడు మీ వీపు పూర్తిగా కుర్చీ వెనుకభాగానికి ఆనించి ఉండాలి. మీ భుజాలు రిలాక్స్‌గా, వెనుకకు ఉండేలా చూసుకోండి.
• మోచేతులు మరియు మణికట్టు: కీబోర్డ్ వాడేటప్పుడు మోచేతులు 90 డిగ్రీల కోణంలో వంగి, మణికట్టు నిటారుగా ఉండాలి. దీనికి ఆర్మ్ రెస్ట్‌లను ఉపయోగించండి.
• నిలబడి పని చేయడం : ఎక్కువసేపు కూర్చోవడం ఆరోగ్యకరం కాదు. వీలైతే, కొంత సమయం నిలబడి పనిచేయడానికి వీలుగా మీ డెస్క్‌ను సర్దుబాటు చేసుకోండి.

మొబైల్ ఫోన్ వాడే సమయంలో తీసుకోవాల్సిన జాగ్రత్తలు

మొబైల్ ఫోన్ వాడకం వల్ల వచ్చే టెక్స్ట్ నెక్ (Text Neck) సమస్యను నివారించడం కీలకం.

• ఫోన్‌ను ఎత్తులో పట్టుకోండి: మొబైల్ ఫోన్‌ను చూసేటప్పుడు తల వంచకుండా, మీ కంటి స్థాయికి దగ్గరగా పట్టుకోవడానికి ప్రయత్నించండి.
• హెడ్ ఫోన్స్ వాడండి : ఫోన్‌లో మాట్లాడేటప్పుడు, ఫోన్‌ను భుజానికి, చెవికి మధ్య పెట్టుకొని మాట్లాడటం మానుకోండి. దీనివల్ల మెడ కండరాలపై ఒత్తిడి పడుతుంది. బదులుగా, హెడ్‌ఫోన్‌లు లేదా స్పీకర్‌ఫోన్ ఉపయోగించండి.
• చిన్న విరామం: మొబైల్‌ను లేదా ట్యాబ్లెట్‌ను ఎక్కువసేపు నిరంతరాయంగా చూడకుండా, ప్రతి 15-20 నిమిషాలకు ఒక చిన్న విరామం తీసుకోండి.

నిద్రించే సమయంలో తీసుకోవాల్సిన జాగ్రత్తలు

రాత్రిపూట మెడకు సరైన సపోర్ట్ ఇవ్వడం వల్ల ఉదయం వచ్చే నొప్పిని నివారించవచ్చు.

• సరైన దిండు (Pillow Selection): మెడ యొక్క సహజమైన వంపును నిలబెట్టే విధంగా దిండును ఎంచుకోండి. ఇది మరీ ఎత్తుగానో లేదా మరీ గట్టిగానో ఉండకూడదు. మెమరీ ఫోమ్ (Memory Foam) దిండ్లు చాలా మందికి సౌకర్యవంతంగా ఉంటాయి.
• రివర్స్ గా పడుకోకండి: పొట్టపై పడుకోవడం (Stomach Sleeping) పూర్తిగా మానుకోండి, ఎందుకంటే దీనివల్ల రాత్రంతా మెడ బలవంతంగా ఒక పక్కకు తిప్పి ఉంటుంది.
• తల పైకి ఉండేలా లేదా పక్కకు: మెడ నొప్పి ఉన్నవారు తల పైకి ఉండేలా లేదా పక్కకు తిరిగి పడుకోవడం ఉత్తమం.
• వ్యాయామం : రోజుకు కనీసం రెండుసార్లు మెడను నెమ్మదిగా పక్కలకు తిప్పడం, పైకి వంచడం, భుజాల వైపు వంచడం వంటి సాధారణ సాగదీసే వ్యాయామాలు చేయండి.
• భుజాల బలోపేతం: మెడ ఒత్తిడిని తగ్గించడానికి భుజాల కండరాలు బలంగా ఉండాలి. భుజాలను పైకి, వెనక్కి గుండ్రంగా తిప్పడం మరియు భుజాలను వెనుకకు లాగడం వంటి వ్యాయామాలు చేయండి.
• శారీరక శ్రమ: సాధారణంగా రోజూ నడవడం, యోగా లేదా ఈత వంటి వ్యాయామాలు చేయడం వల్ల మొత్తం శరీరం మరియు వెన్నెముక ఆరోగ్యంగా ఉంటాయి.
• రిలాక్సేషన్: ధ్యానం , డీప్ బ్రీతింగ్ మరియు ఇతర రిలాక్సేషన్ పద్ధతులు సాధన చేయండి. ఇవి మెడ మరియు భుజాల కండరాలు బిగుసుకుపోకుండా నివారిస్తాయి.
• పని మధ్యలో విరామం : పని మధ్యలో అరగంటకోసారి లేచి, కొద్దిసేపు అటూ ఇటూ నడవండి లేదా మెడను మెల్లగా కదపండి.

వైద్యుడిని ఎప్పుడు సంప్రదించాలి?

మెడనొప్పి కలగడానికి పైన వివరించినట్టు వివిధ కారణాలు ఉంటాయి. సాధారణంగా మెడనొప్పి తీవ్రత తక్కువగా ఉంటే రెండు లేదా మూడు రోజులపాటు మందుల వాడకం మరియు జీవనశైలి మార్పులతో సులభంగా తగ్గిపోతుంది. అయితే మెడనొప్పిని నిర్లక్ష్యం చేస్తే అది మరింత తీవ్రతరం అవ్వడమే కాకుండా మన రోజువారీ జీవితాన్ని ప్రభావితం చేస్తుంది. మెడనొప్పికి చికిత్స చేయకపోతే దాని వలన భుజం మరియు వెన్నునొప్పి కూడా వచ్చే ప్రమాదం ఉంది. కాబట్టి మీకు మెడనొప్పి సమస్య ఉంటే వీలైనంత త్వరగా వైద్యులను సంప్రదించడం అవసరం. మెడనొప్పి సమస్యకు చికిత్స అందించడానికి యశోద హాస్పిటల్స్ లో అత్యుత్తమ ఆర్థోపెడిక్ నిపుణులు, స్పైన్ సర్జన్లు అందుబాటులో ఉన్నారు.

మీ ఆరోగ్య సంరక్షణ గురించి ఏవైనా సందేహాలు ఉన్నాయా? సహాయం చేయడానికి మేము సిద్దంగా ఉన్నాము! మా అనుభవంతులైన నిపుణుల సలహా కొరకు +918065906165 కి కాల్ చేయగలరు.