ట్రైగ్లిజరైడ్స్ అంటే ఏమిటి? శరీరంలో వాటి ప్రయోజనం, పనితీరు, లక్షణాలు, జాగ్రత్తలు

ట్రైగ్లిజరైడ్స్ అంటే ఏమిటి?

ట్రైగ్లిజరైడ్స్ అంటే రక్తంలో ఉండే ఒక విధమైన కొవ్వు పదార్ధాలు, ఇవి రక్తంతో పాటుగా రక్తనాళాల్లో ప్రవహిస్తూ ఉంటాయి. శరీరానికి శక్తి అవసరమైనప్పుడు తగినంత ఆహారం తీసుకోవడం ఆలస్యమైతే ఆ సమయంలో ట్రైగ్లిజరైడ్స్ ను కరిగించి శరీరం ఉపయోగించుకుంటుంది. శరీరానికి అవసరమైన దానికంటే ఎక్కువ క్యాలరీలు కలిగిన ఆహారాన్ని తీసుకున్నప్పుడు అది కొవ్వు కణాలుగా ఏర్పడుతుంది, ఈ కొవ్వు కణాలనే ట్రైగ్లిజరైడ్స్ అంటారు. సాధారణంగా మనం తీసుకునే నూనె, వెన్న లాంటి కొవ్వు పదార్ధాలు ట్రైగ్లిజరైడ్స్ గా మారుతాయి, అధికంగా తీసుకునే చక్కెర, ఆల్కహాల్ కూడా ట్రైగ్లిజరైడ్స్ గా మారుతాయి. యువకులలో ట్రైగ్లిజరైడ్స్ స్థాయి ఒక డెసిలీటర్ కు 90 మిల్లీగ్రాముల వరకూ ఉండవచ్చు. పెద్దలలో ట్రైగ్లిజరైడ్స్ స్థాయి ఒక ఒక డెసిలీటర్ కు 150 మిల్లీగ్రాముల వరకూ ఉండవచ్చు. ఈ స్థాయి దాటితే గుండెపోటు వచ్చే ప్రమాదం ఉంది.

శరీరంలో అధిక ట్రైగ్లిజరైడ్స్ ఉండడానికి కారణం ఏమిటి?

శరీరంలో ట్రైగ్లిజరైడ్స్ స్థాయి పెరగడానికి జీవనశైలి, ఆహారపు అలవాట్లతో పాటుగా అనేక కారణాలు ఉన్నాయి. ట్రైగ్లిజరైడ్స్ స్థాయి పెరగడానికి గల కారణాలను ఇక్కడ వివరంగా తెలుసుకోవచ్చు.

ఆల్కహాల్ సేవించడం : ఆల్కహాల్ సేవించడం అనేక రకాలైన అనారోగ్యాలకు కారణం అవుతుంది, మనం తీసుకునే ఆల్కహాల్ రక్తంలో కలిసి ట్రైగ్లిజరైడ్స్ గా మారుతుంది. ఇలా మారిన ఆల్కహాల్ కొవ్వు పదార్థంగా రక్తకణాల్లో పేరుకుపోతుంది. దీనివలన రక్తప్రసరణకు ఆటంకం ఏర్పడుతుంది.

కార్బోహైడ్రేట్స్ ఎక్కువగా ఉండే ఆహారం : కార్బోహైడ్రేట్స్ ఎక్కువగా ఉండే ఆహారం తీసుకోవడం వలన శరీరంలో క్యాలరీలు పెరిగిపోతాయి. శరీరానికి అవసరమైన దానికంటే ఎక్కువ క్యాలరీలు ట్రైగ్లిజరైడ్స్ గా మారుతాయి.

మధుమేహం : మధుమేహం వలన రక్తంలో చక్కెర స్థాయిలు పెరుగుతాయి. రక్తంలో అధికంగా ఉన్న చక్కెర కణాలు ట్రైగ్లిజరైడ్స్ గా మారుతాయి.

కనీస శారీరక శ్రమ లేకపోవడం : ప్రతీరోజూ మనం ఆహారాన్ని తీసుకుంటాం, జీర్ణమైన ఆహారం మన శరీర కదలికల కోసం ఉపయోగపడుతుంది, ఒకవేళ శారీరక శ్రమ లేదా వ్యాయామం కనీస స్థాయిలో కూడా చేయనప్పుడు జీర్ణమైన ఆహారం రక్తంలో ట్రైగ్లిజరైడ్స్ గా మారుతుంది.

కాలేయానికి సంబంధించిన వ్యాధులు : సాధారణంగా మన శరీరంలో కాలేయం రక్తాన్ని శుద్ధి చేస్తుంది, ఫ్యాటీ లివర్, లివర్ సిర్రోసిస్ వంటి కాలేయ వ్యాధుల కారణంగా కాలేయ పనితీరు మందగిస్తుంది. దీని ఫలితంగా రక్తంలో ట్రైగ్లిజరైడ్స్ స్థాయి పెరుగుతుంది.

కిడ్నీ సంబంధించిన వ్యాధులు : శరీరంలో మూత్రపిండాలు సరిగా పనిచేయకపోవడం వలన వ్యర్ధ పదార్ధాలు బయటకు వెళ్లకుండా శరీరంలోనే ఉండిపోతాయి. అంతే కాకుండా శరీరంలో ఉన్న రక్తం పూర్తి స్థాయిలో శుద్ధి జరగదు, దీనివలన రక్తంలో ట్రైగ్లిజరైడ్స్ స్థాయి పెరుగుతుంది.

ఊబకాయం : ఊబకాయం లేదా అధిక బరువు కలిగిన వారిలో కొలెస్ట్రాల్ స్థాయిలు ఎక్కువగా ఉండే అవకాశం ఉంది. దీని వలన రక్తంలో ట్రైగ్లిజరైడ్స్ స్థాయి అధికమవుతుంది.

అధిక ట్రైగ్లిజరైడ్స్ లక్షణాలు – శరీరంలో ట్రైగ్లిజరైడ్స్ అధికంగా ఉంటే ఏం జరుగుతుంది?

శరీరం ఉపయోగించుకోలేని కొవ్వు పదార్ధాలు రక్తంలో ట్రైగ్లిజరైడ్స్ గా మారుతాయి. ఈ ట్రైగ్లిజరైడ్స్ రక్తనాళాల్లో అధికంగా ఉండడం వలన రక్తప్రసరణకు ఆటంకం ఏర్పడుతుంది. దీనివలన గుండెపోటుతో పాటు అనేక సమస్యలు కలిగే అవకాశం ఉంది. అధిక ట్రైగ్లిజరైడ్స్ లక్షణాలను ఈ క్రింద వివరంగా తెలుసుకోవచ్చు.

గుండెపోటు : రక్తంలో ట్రైగ్లిజరైడ్స్ స్థాయి పెరగడం వలన గుండెకు ఆక్సిజన్ సరఫరా చేసే రక్తనాళ్ళల్లో ఆటంకం ఏర్పడుతుంది. ఫలితంగా గుండె మీద ఒత్తడి పెరిగి గుండెపోటుకు దారి తీస్తుంది.

ఛాతీలో నొప్పి : ట్రైగ్లిజరైడ్స్ స్థాయి అధికంగా ఉండడం వలన రక్తనాళ్ళలో కొవ్వు కణాలు పేరుకుపోతాయి. దీని వలన ఛాతీ నొప్పి సంభవించే అవకాశం ఉంది.

ట్రైగ్లిజరైడ్స్ స్థాయి తెలుసుకోవడానికి ఏ పరీక్షలు చేయాలి?

రక్తంలో ట్రైగ్లిజరైడ్స్ స్థాయి తెలుసుకోవడానికి డాక్టర్లు రక్త పరీక్షను సూచిస్తారు. రక్త పరీక్ష ద్వారా రక్తంలో ఉండే కొలెస్ట్రాల్ మరియు ట్రైగ్లిజరైడ్స్ స్థాయిలను నిర్దారిస్తారు.

ట్రైగ్లిజరైడ్స్ తగ్గాలంటే ఎలాంటి జాగ్రత్తలు తీసుకోవాలి?

రక్తంలో ట్రైగ్లిజరైడ్స్ స్థాయి అధికంగా ఉండడం వలన గుండెపోటు సంభవించే ప్రమాదం ఎక్కువగా ఉంది. కాబట్టి ట్రైగ్లిజరైడ్స్ స్థాయి అధికం అవ్వకుండా తగిన జాగ్రత్తలు తీసుకోవాల్సిన అవసరం ఉంది.

తగినంత వ్యాయామం : శరీరం రక్తంలో కొవ్వును ఉపయోగించుకోకపోవడం వలన ట్రైగ్లిజరైడ్స్ స్థాయి పెరిపోతుంది, ప్రతీరోజూ 30 నిమిషాల నుండి 60 నిమిషాల పాటు వ్యాయామం చేయడం వలన ట్రైగ్లిజరైడ్స్ స్థాయి పెరగకుండా ఉంటుంది. రక్తంలో నిల్వ ఉన్న ట్రైగ్లిజరైడ్స్ ను కూడా తగినంత వ్యాయామం చేయడం ద్వారా తగ్గించవచ్చు.

ఆల్కహాల్ మానడం : అధికంగా ఆల్కహాల్ ను తీసుకోవడం వలన రక్తంలో ట్రైగ్లిజరైడ్స్ స్థాయి ప్రమాదకరంగా పెరుగుతాయి. ఆల్కహాల్ అలవాటును మానుకోవడం ద్వారా ట్రైగ్లిజరైడ్స్ స్థాయి అధికం అవ్వకుండా నిరోధించవచ్చు.

ఆహారంలో మార్పు : ఆహారంలో కొలెస్ట్రాల్ పెరగడానికి కారణమయ్యే నూనె పదార్ధాలను తగ్గించాలి, అంతే కాకుండా ఫైబర్ అధికంగా ఉండే ఆహారాన్ని తీసుకోవాలి. ప్రాసెస్ చేసిన ఆహారాన్ని తగ్గించాలి. తాజా కూరగాయలను, పండ్లను ఆహారంలో భాగంగా చేసుకోవాలి.

ఒత్తిడి నిర్వహణ : మానసిక ఒత్తిడి కూడా ట్రైగ్లిజరైడ్స్ స్థాయి మీద ప్రభావం చూపిస్తుంది, కాబట్టి వర్క్ – లైఫ్ బ్యాలన్స్ చేసుకుంటూ ఒత్తిడిని తగ్గించుకోవాలి.

బరువు నిర్వహణ : అధిక బరువు, ఊబకాయం ఉన్నవారిలో ట్రైగ్లిజరైడ్స్ స్థాయి ఎక్కువగా ఉండే అవకాశం ఉంది, కాబట్టి శరీర బరువును నియంత్రణలో ఉంచుకోవడం చాలా అవసరం.

ట్రైగ్లిజరైడ్స్ సాధారణ స్థాయిలో ఉంచడానికి పాటించవలసిన ఆహార నియమాలు

రక్తంలో ట్రైగ్లిజరైడ్స్ సాధారణ స్థాయిలో ఉంచడానికి ఈ క్రింద సూచించిన ఆహార నియమాలు పాటించవచ్చు.

ఫైబర్ అధికంగా ఉన్నవి : తాజా కాయగూరలు, పండ్లు, తృణ ధాన్యాలు మొదలైన వాటిలో ఫైబర్ అధికంగా ఉంటుంది. వీటిని ఆహారంలో భాగంగా చేసుకోవడం వలన ట్రైగ్లిజరైడ్స్ స్థాయి అదుపులో ఉంటుంది.

ఒమేగా-3 ఆమ్లాలు కలిగినవి: ఒమేగా – 3 ఫ్యాటీ యాసిడ్స్ రక్తంలో ట్రైగ్లిజరైడ్స్ ను తగ్గిస్తాయి, మరియు రక్తనాళాల్లో రక్తం గడ్డ కట్టకుండా నిరోధిస్తాయి, ఒమేగా-3 ఫ్యాటీ యాసిడ్స్ ఎక్కువగా ఉండే ఆహారం తీసుకోవడం వలన ట్రైగ్లిజరైడ్స్ స్థాయి తగ్గుతుంది.

ప్రాసెస్ చేసిన ఆహరం వద్దు: నేటి ఉరుకుల పరుగుల జీవితంలో చాలామంది ప్రాసెస్ చేసిన ఆహారాన్ని నిత్యం తీసుకుంటూనే ఉన్నారు. ఇవి శరీరానికి చాలా సమస్యలను కలుగజేస్తాయి, ఇలాంటి ఆహారాన్ని పూర్తిగా తగ్గించడం చాలా అవసరం.

స్వీట్లు/ చక్కెర పదార్ధాలు తగ్గించాలి: అధికంగా చక్కెర పదార్ధాలను తీసుకోవడం వలన ట్రైగ్లిజరైడ్స్ స్థాయి పెరిగే అవకాశం ఉంది, దాంతో పాటుగా మధుమేహం లాంటి మరెన్నో అనారోగ్యాలకు కారణం అవుతుంది.

మీ ఆరోగ్య సంరక్షణ గురించి ఏవైనా సందేహాలు ఉన్నాయా? సహాయం చేయడానికి మేము సిద్దంగా ఉన్నాము! మా అనుభవంతులైన నిపుణుల సలహా కొరకు +918065906165 కి కాల్ చేయగలరు.