గ్యాస్ట్రిక్ సమస్య యొక్క లక్షణాలు, కారణాలు మరియు నివారణ చర్యలు

అసౌకర్యానికి గురిచేసే జీర్ణకోశ వ్యవస్థకు సంబంధించిన పలు రకాల సమస్యల్లో గ్యాస్ట్రిక్ సమస్య ప్రధానమైనదిగా చెప్పవచ్చు. ప్రస్తుతం ఉన్న జీవన సరళిలో ప్రతి ఒక్కరు ఏదో ఒక సమయంలో గ్యాస్‌ సమస్యతో ఇబ్బంది పడుతుంటారు. మనం తీసుకున్న ఆహారం గొంతు నుంచి ఆహారనాళం ద్వారా పొట్టలోని జీర్ణశయంలోకి చేరుతుంది. అక్కడ ఆహారాన్ని జీర్ణం చేయడం కోసం యాసిడ్స్‌తో పాటు పెప్సిన్‌ వంటి ఎంజైములు ఉత్పత్తి అవుతుంటాయి. ఈ యాసిడ్స్‌ ఎక్కువగా ఉత్పత్తి అయ్యేకొద్ది కడుపులో గ్యాస్ట్రిక్ సమస్య మొదలవుతుంది.

చాలా మందిలో కడుపుకు సంబంధించి అనేక సమస్యలు సాధారణంగా వస్తుంటాయి. అయితే ఈ గ్యాస్ట్రిక్ సమస్య మొదలైతే చాలు మరెన్నో సమస్యలు చూట్టు ముట్టి అనేక అనారోగ్య సమస్యలకు సైతం దారితీస్తాయి. ఈ గ్యాస్ట్రిక్ సమస్య కారణంగా ఏదైనా తినాలన్నా భయమే. ఈ సమస్య వల్ల కడుపులో గ్యాస్‌ తయారయ్యి ఛాతీ నొప్పి, కడుపు నొప్పి, మంట వంటి సమస్యలు సైతం వస్తాయి.

గ్యాస్ట్రిక్ సమస్య యొక్క లక్షణాలు

గ్యాస్ట్రిక్ సమస్య యొక్క లక్షణాలు ప్రత్యేకంగా లేనప్పటికీ, ఈ క్రింది లక్షణాలను కలిగి ఉంటాయని చెప్పవచ్చు:

• వికారం మరియు అజీర్ణం: ఆహారం సరిగా జీర్ణం కాకపోవడం వల్ల కడుపులో అసౌకర్యంగా అనిపించడం, వాంతి వస్తున్నట్లు అనిపించడం వంటివి జరుగుతాయి.
• ఆకలి లేకపోవడం: గ్యాస్ట్రిక్ సమస్య వల్ల కడుపు నిండుగా అనిపించి, తినాలనే కోరిక తగ్గడం లేదా పూర్తిగా ఆకలి వేయకపోవడం జరుగుతుంది.
• నోటిలో నీళ్లు ఊరడం మరియు పొట్ట ఉబ్బరంగా అనిపించడం: కడుపులో గ్యాస్ చేరినందువల్ల పొట్ట ఉబ్బినట్లు అనిపించడంతో పాటు, కొన్నిసార్లు పుల్లటి త్రేన్పుల వల్ల నోటిలో లాలాజలం ఎక్కువగా ఊరుతుంది.
• తేన్పులు రావడం: కడుపులో పేరుకుపోయిన గ్యాస్ బయటకు వెళ్లడానికి ప్రయత్నించినప్పుడు పదేపదే పెద్ద శబ్దంతో కూడిన తేన్పులు వస్తుంటాయి.
• ఎక్కిళ్ళు: గ్యాస్ట్రిక్ సమస్యలు అప్పుడప్పుడు ఎక్కిళ్లకు దారితీస్తాయి, ఇది డయాఫ్రమ్ కండరాల సంకోచం వల్ల వస్తుంది.
• ఆహారం తీసుకున్న తర్వాత ఆయాసం రావడం: భోజనం చేసిన వెంటనే కడుపు ఉబ్బరంగా మారి, ఊపిరి తీసుకోవడంలో కొద్దిగా ఇబ్బంది లేదా అసౌకర్యం కలగవచ్చు.
• గుండెలో మంటగా అనిపించి తేన్పు రావడానికి ఇబ్బంది పడడం: యాసిడ్ రిఫ్లక్స్ వల్ల ఛాతీలో మంటగా అనిపించడంతో పాటు, గ్యాస్ ఉన్నప్పటికీ తేన్పు సరిగా రాక ఇబ్బంది పడతారు.
• వాంతి అవుతున్నట్లు అనిపించడం: కడుపులోని ఆహారం బయటకు వస్తున్నట్లుగా గొంతు వరకు వచ్చి ఆగిపోవడం లేదా నిజంగా వాంతులు కావడం జరుగుతుంది.
• పొత్తికడుపు పైభాగం నిండిన అనుభూతి కలగడం: తక్కువ ఆహారం తీసుకున్నా కూడా కడుపు పైభాగం పూర్తిగా నిండినట్లు, బరువుగా అనిపించడం జరుగుతుంది.
• కడుపులో మరియు పొత్తికడుపులో మంట, నొప్పి రావడం: కడుపులోని యాసిడ్ స్థాయిలు పెరగడం వల్ల లేదా పొట్ట లోపలి పొరకు చికాకు కలగడం వల్ల మంటతో కూడిన నొప్పి వస్తుంది.

గ్యాస్ట్రిక్ సమస్యలు మిమ్మల్ని బాధిస్తున్నాయా?

గ్యాస్ట్రిక్ సమస్యకు కారణాలు

గ్యాస్ట్రిక్ సమస్య వివిధ కారణాల వల్ల వస్తుంది, మరిముఖ్యంగా 20 సంవత్సరాలు పైబడిన వారిలో ఇది ఎక్కువగా కనిపిస్తుంది. గ్యాస్ట్రిక్ సమస్యకు దారితీసే కొన్ని ప్రధాన కారణాలను ఈ క్రింద వివరంగా చూద్దాం:

• సరైన సమయానికి ఆహారం తీసుకోకపోవడం: క్రమం తప్పకుండా ఆహారం తీసుకోకపోవడం లేదా టిఫిన్ కి మరియు భోజనానికి మధ్య ఎక్కువ విరామం ఉండటం వల్ల కడుపులో యాసిడ్స్ ఉత్పత్తి పెరిగి గ్యాస్ట్రిక్ సమస్యలకు దారితీస్తుంది. అందువల్ల కడుపులో మంట మరియు నొప్పి అనేవి వస్తాయి.
• మధ్యపానం & ధూమపానం: మద్యం మరియు పొగాకుకు సంబందించిన ఉత్పత్తులు జీర్ణవ్యవస్థలోని పొరపై ప్రభావం చూపడంతో, కడుపులోని యాసిడ్ ఉత్పత్తులు పెరుగుతాయి. దీనివల్ల గ్యాస్ట్రిక్ సమస్యలు, అసిడిటీ మరియు అల్సర్లు వచ్చే ప్రమాదం ఎక్కువగా ఉంటుంది.
• కదలకుండా ఎక్కువసేపు ఒకే ప్రదేశంలో కూర్చోవడం: శారీరక శ్రమ లేకపోవడం వల్ల జీర్ణక్రియ నెమ్మదిస్తుంది. ఎక్కువసేపు కదలకుండా కూర్చోవడం వల్ల ఆహారం సరిగా జీర్ణం కాక, గ్యాస్ మరియు పొట్ట ఉబ్బరం వంటి సమస్యలు తలెత్తుతాయి.
• మానసిక ఆందోళనలు, దిగులు, కుంగుబాటు, ఒత్తిడి, అలసటకు గురవుతుండడం: మానసిక ఒత్తిడి మరియు ఆందోళనలు జీర్ణవ్యవస్థ పనితీరును ప్రభావితం చేస్తాయి. ఒత్తిడి సంబంధిత హార్మోన్లు కడుపులో యాసిడ్ ఉత్పత్తిని పెంచి, గ్యాస్ట్రిక్ సమస్యలకు దారితీస్తాయి.
• టీ/కాఫీ వంటివి అధిక మోతాదులో తీసుకోవడం: టీ, కాఫీలలో ఉండే కెఫిన్ కడుపులో యాసిడ్ ఉత్పత్తిని ప్రేరేపిస్తుంది. వీటిని అధికంగా తీసుకోవడం వల్ల అసిడిటీ, ఛాతీలో మంట, మరియు గ్యాస్ట్రిక్ నొప్పి వంటివి పెరుగుతాయి.
• ఆహారం సరిగ్గా నమిలి మింగకపోవడం: ఆహారాన్ని సరిగా నమలకపోతే, అది పెద్ద ముక్కలుగా కడుపులోకి వెళ్లి జీర్ణం కావడానికి ఎక్కువ సమయం పడుతుంది. దీనివల్ల జీర్ణవ్యవస్థపై భారం పడి, గ్యాస్ మరియు అజీర్ణం వంటి సమస్యలు వస్తాయి.
• చల్లటి పానీయాలు ఎక్కువగా తాగే వారిలోనూ ఈ సమస్య మరింత ఎక్కువగా వచ్చే అవకాశం ఉంటుంది: అతి చల్లటి పానీయాలు జీర్ణక్రియను నెమ్మదిస్తాయి మరియు కడుపులోని ఎంజైమ్‌ల పనితీరును ప్రభావితం చేస్తాయి. ఇది గ్యాస్, పొట్ట ఉబ్బరం మరియు అజీర్ణానికి దారితీయవచ్చు.
• నొప్పి నివారణ మరియు ఇతర రకాల మందులను అధిక మోతాదులో తీసుకోవడం: కొన్ని రకాల మందులు, ముఖ్యంగా నొప్పి నివారణ మాత్రలు (NSAIDs), కడుపులోని పొరను దెబ్బతీసి యాసిడ్ ఉత్పత్తిని పెంచుతాయి. వీటిని అధిక మోతాదులో లేదా ఎక్కువ కాలం వాడటం వల్ల గ్యాస్ట్రిక్ సమస్యలు, అల్సర్లు వస్తాయి.
• అధిక బరువు కలిగి ఉండడం, హెచ్. పైలోరీ ద్వారా వచ్చే బాక్టీరియల్ ఇన్ఫెక్షన్, ఆటో ఇమ్యూన్ వంటి వ్యాధుల కారణంగా: అధిక బరువు జీర్ణవ్యవస్థపై ఒత్తిడిని పెంచుతుంది. హెలికోబాక్టర్ పైలోరీ (H. pylori) అనే బాక్టీరియా కడుపులో ఇన్ఫెక్షన్ కలిగించి గ్యాస్ట్రిక్ సమస్యలు, అల్సర్లు మరియు క్యాన్సర్‌కు కారణమవుతుంది. అలాగే, కొన్ని ఆటో ఇమ్యూన్ వ్యాధులు కూడా జీర్ణవ్యవస్థను ప్రభావితం చేస్తాయి.
• సరిగా నిద్రలేనప్పుడు మరియు రాత్రి వేళలా పనిచేసేవారిలో ఈ గ్యాస్‌ సమస్య వస్తుంది: నిద్రలేకపోవడం వల్ల శరీర లయ దెబ్బతింటుంది, ఇది జీర్ణక్రియను ప్రభావితం చేస్తుంది. రాత్రి వేళల్లో పనిచేసేవారిలో ఆహారపు అలవాట్లు, నిద్ర సమయాలు మారడం వల్ల గ్యాస్ట్రిక్ సమస్యలు సాధారణం.
• కలుషితమైన సీ ఫుడ్స్‌ తినడం వల్ల కూడా ఈ సమస్య వచ్చే అవకాశం ఉంటుంది: కలుషితమైన లేదా సరిగా ఉడికించని సీ ఫుడ్స్ తినడం వల్ల బాక్టీరియల్ ఇన్ఫెక్షన్లు వచ్చి, తీవ్రమైన గ్యాస్ట్రిక్ సమస్యలు, వాంతులు మరియు విరేచనాలు సంభవించవచ్చు.

గ్యాస్ నొప్పి మరియు గుండెపోటు నొప్పి మధ్య తేడా

గుండె దగ్గర వచ్చే నొప్పి అలాగే గ్యాస్ట్రిక్ సమస్య వల్ల వచ్చే నొప్పి దాదాపు ఒకేలా ఉంటాయి. దీంతో చాలా మంది గ్యాస్ట్రిక్ సమస్యతో నొప్పి వచ్చినా అది గుండె నొప్పి ఏమో అని చాలా కంగారు పడుతుంటారు. వీటిని గమనించుకోవడం చాలా ముఖ్యం.

పైన క్లుప్తంగా వివరించినట్లుగా, గ్యాస్ట్రిక్ సమస్యలు ఇటువంటి లక్షణాలను చూపిస్తాయి:

• గ్యాస్ట్రిక్ సమస్య సాధారణంగా ఆహారం తీసుకున్న తర్వాత వస్తుంది
• గ్యాస్ట్రిక్ సమస్య ఉన్నవారిలో పొట్ట, ఛాతీలో నొప్పి వస్తుంది. ఆ నొప్పి వెన్నెముక వైపుగా వ్యాపిస్తుంది
• గొంతులో మంట
• కడుపు మరియు ఛాతీ భాగంలో మండినట్లుగా ఉంటుంది
• కడుపులో మంట, తెన్పులు రావడం
• గ్యాస్ట్రిక్ సమస్య ఉన్న వారు నీరసంగా ఉంటారు

గుండెపోటు యొక్క లక్షణాలు:

గుండెపోటు అనేది ఆకస్మికంగా వచ్చి, తీవ్రమైన నొప్పిని కలిగిస్తుంది. ఈ నొప్పి మెడ వరకు వ్యాపిస్తుంది. గ్యాస్ట్రిక్ సమస్య లక్షణాలు ఉన్నప్పటికీ, గుండెపోటులో కనిపించే కొన్ని ప్రత్యేక లక్షణాలు ఇక్కడ ఉన్నాయి:

• శరీరం అంతా చెమటలు పట్టి చల్లగా అయిపోతుంది: గుండెపోటు వచ్చినప్పుడు, శరీరంలో తీవ్రమైన ఒత్తిడి ఏర్పడి విపరీతంగా చెమటలు పడతాయి. ఈ చెమటల వల్ల శరీరం చల్లగా మారిపోతుంది.
• ఊపిరి తీసుకోవడానికి చాలా ఇబ్బంది పడుతుంటారు: గుండె రక్త పంపిణీ సరిగా చేయలేకపోవడం వల్ల ఊపిరితిత్తులకు తగినంత ఆక్సిజన్ అందదు. దీంతో శ్వాస తీసుకోవడం చాలా కష్టంగా, బిగుసుకుపోయినట్లు అనిపిస్తుంది.
• ఛాతీలో నొప్పి ప్రారంభమై ఎడమ చేతి వైపుగా వ్యాపిస్తుంది మరియు కాలి వేళ్ల వరకు ఈ నొప్పి వస్తుంది: గుండెపోటు ప్రధాన లక్షణం ఛాతీ మధ్యలో మొదలయ్యే నొప్పి. ఈ నొప్పి క్రమంగా ఎడమ చేయి మొత్తం పాకుతూ, కొన్నిసార్లు వేళ్ల వరకు కూడా వెళ్లవచ్చు.
• ఛాతీలో నొప్పి మొదలై ఎడమ వైపు దవడ మరియు కుడి చేతి వరకూ కూడా ఈ నొప్పి వ్యాపిస్తుంది: నొప్పి కేవలం ఎడమ చేయికి మాత్రమే పరిమితం కాకుండా, ఎడమ వైపు దవడలోకి, మెడలోకి, వెనుక భాగంలోకి మరియు అరుదుగా కుడి చేతిలోకి కూడా వ్యాపించవచ్చు. ఇది గుండెపోటు యొక్క ఒక విలక్షణమైన లక్షణం.

గ్యాస్ట్రిక్ సమస్యలు ఉన్నవారు తీసుకోవాల్సిన జాగ్రత్తలు

గ్యాస్ట్రిక్ సమస్యలతో బాధపడేవారు తమ జీవనశైలిలో కొన్ని ముఖ్యమైన మార్పులు చేసుకోవడం ద్వారా ఉపశమనం పొందవచ్చు. ముఖ్యంగా వారు తీసుకోవాల్సిన జాగ్రత్తలు ఈ క్రింద వివరించబడ్డాయి:

• సరిపడా నీరును త్రాగాలి: గ్యాస్ట్రిక్ సమస్య ఉన్నవారు రోజుకు కనీసం 4 లీటర్ల నీటిని తప్పనిసరిగా తాగాలి. ఇది జీర్ణక్రియకు సహాయపడి, శరీరంలో నీటి సమతుల్యతను కాపాడుతుంది.
• మానసిక ప్రశాంతత: ఒత్తిడి గ్యాస్ట్రిక్ సమస్యలను మరింత పెంచుతుంది. కాబట్టి, ప్రశాంతంగా ఉండటానికి యోగా, ధ్యానం వంటివి సాధన చేయాలి. మానసిక ఆందోళనలను తగ్గించుకోవడం అనేది చాలా అవసరం.
• కొన్ని పానీయాలకు దూరం: మధ్యపానం, కూల్ డ్రింక్స్ మరియు కార్బోనేటెడ్ డ్రింక్స్ వంటి వాటికి పూర్తిగా దూరంగా ఉండాలి. ఇవి కడుపులో యాసిడ్ ఉత్పత్తిని పెంచి, గ్యాస్ట్రిక్ సమస్యలను మరింత తీవ్రతరం చేస్తాయి.
• ఆహారాన్ని చిన్న మోతాదులో తరుచూ తీసుకోవడం: ఆహారాన్ని ఒకేసారి ఎక్కువగా కాకుండా, తక్కువ మోతాదులో తరచుగా తీసుకోవాలి. ఇది జీర్ణవ్యవస్థపై భారాన్ని తగ్గించి, గ్యాస్ ఏర్పడకుండా నిరోధిస్తుంది.
• ఆహారాన్ని నెమ్మదిగా తినాలి: ఆహారాన్ని నెమ్మదిగా తీసుకోవాలి మరియు ప్రతి ముద్దను మెత్తగా నమిలి మింగాలి. ఇలా చేయడం వల్ల ఆహారం సరిగా జీర్ణమై, అజీర్ణం మరియు గ్యాస్ సమస్యలు తగ్గుతాయి.
• క్రమం తప్పక అల్పాహారం: ఉదయాన్నే అల్పాహారం తినడం ఎప్పుడూ మరిచిపోకూడదు, ఇది జీర్ణవ్యవస్థను ఉత్తేజపరిచి, రోజు మొత్తానికి సరైన జీర్ణక్రియకు పునాది వేస్తుంది.
• కొన్ని ఆహారాలకు పరిమితి: పులుపు పదార్థాలు, పచ్చళ్ళు, మసాలాలు, నూనెతో కూడిన ఆహారాలు (ఆయిల్‌ఫుడ్స్), జంక్ ఫుడ్స్ వంటివి ఎక్కువగా తీసుకోకూడదు. ఇవి కడుపులో మంటను కలిగించి గ్యాస్ట్రిక్ సమస్యలను పెంచుతాయి.
• ఆరోగ్యకరమైన ఆహారాలను రోజువారీ డైట్లో చేర్చుకోవడం: పండ్లు, వెజిటబుల్ సలాడ్స్, నట్స్ వంటి వాటిని ఎక్కువగా తీసుకోవాలి. ఇవి శరీరానికి అవసరమైన పోషకాలను అందించి, జీర్ణక్రియను మెరుగుపరుస్తాయి.
• కొన్ని పదార్థాలకు దూరం: మైదా, సోయాబీన్స్, పాలు, శనగలు, రాజ్మా, నట్స్, పేస్ట్రీలు వంటి కొన్ని పదార్థాలకు దూరంగా ఉండాలి. ఇవి కొందరిలో గ్యాస్ మరియు జీర్ణ సమస్యలకు కారణం కావచ్చు.
• రోజువారీ వ్యాయామం: ప్రతి రోజూ క్రమం తప్పకుండా వ్యాయామం చేయడం వల్ల జీర్ణక్రియ మెరుగుపడుతుంది. శారీరక శ్రమ జీర్ణవ్యవస్థను చురుకుగా ఉంచుతుంది.
• పీచు పదార్థాలు (ఫైబర్) అధికంగా తీసుకోవడం: ఫైబర్ (పీచు పదార్థాలు), కీరదోసకాయ, బీరకాయ వంటివి ఎక్కువగా తీసుకోవడం వల్ల మలబద్ధక సమస్య తగ్గి, గ్యాస్ సమస్య బారిన పడకుండా ఉంటారు.
• మద్యపానం, ధూమపానం పూర్తిగా మానివేయాలి: ఎట్టి పరిస్థితుల్లోనూ మద్యపానం, ధూమపానం జోలికి వెళ్లకూడదు. ఇవి గ్యాస్ట్రిక్ సమస్యలకు ప్రధాన కారణాలు మరియు దీర్ఘకాలికంగా ఆరోగ్యానికి తీవ్ర నష్టం కలిగిస్తాయి.
• రాత్రి ఆహారపు సమయం: రాత్రి పూట ఆహారాన్ని పడుకోవడానికి కనీసం 2 గంటల ముందు తీసుకోవాలి. ఇది ఆహారం జీర్ణం కావడానికి తగిన సమయాన్ని ఇచ్చి, రాత్రిపూట గ్యాస్ట్రిక్ సమస్యలు రాకుండా నిరోధిస్తుంది.

ఈ విధంగా పైన పేర్కొన్న నియమాలను క్రమం తప్పకుండా పాటించినట్లయితే, గ్యాస్ట్రిక్ సమస్య నుంచి మనల్ని మనం సమర్థవంతంగా కాపాడుకోవచ్చు మరియు ఆరోగ్యకరమైన జీవనశైలిని పొందవచ్చు.

కడుపులో పేగులు ఎందుకు అరుస్తాయి?

కొన్ని సార్లు మన పేగుల్లో నుంచి శ‌బ్దాలు వస్తుంటాయి. అందుకు ప్రధాన కారణం పేగుల్లో ఆహారం క‌ద‌లిక‌లు జరుగుతున్నపుడు గ్యాస్ ఏర్ప‌డడం వల్ల మన కడుపులో నుంచి ఈ శబ్దాలు వస్తాయి.

వీటి వల్ల ఎలాంటి హాని ఉండదు కానీ, అస‌లు పేగులో శ‌బ్దాలు రానివారు మాత్రం మ‌ల‌బ‌ద్ద‌క సమస్యతో బాధ‌ప‌డుతున్న‌ట్లు అర్థం చేసుకోవాలి. ఇక పేగుల నుంచి ఎక్కువ‌ శ‌బ్దాలు వ‌స్తుంటే మాత్రం గ్యాస్ట్రిక్ లేదా విరేచ‌నాల స‌మ‌స్య ఉంద‌ని తెలుసుకోవాలి.

అలాగే వికారం, వాంతులు అయ్యే వారికి, అవ‌బోతున్న వారికి కూడా పేగులు అరవడం సాధారణం. అయితే పేగుల్లో శ‌బ్దాలు అస‌లు రాక‌పోయినా, మ‌రీ ఎక్కువ‌గా వ‌స్తున్నా తప్పనిసరిగా ఒక సారి వైద్యుడిని సంప్రదించడం ఉత్తమం.

శరీరానికి మేలు చేసే ఆహారంతోనూ గ్యాస్ట్రిక్ సమస్య ఉండటం సాధారణమే అయితే జీర్ణ శక్తిని పెంచుకోవడం వల్ల ఈ బాధ నుంచి ఉపశమనం పొందవచ్చు. జీర్ణశక్తి ఎంత బాగా మెరుగుపడితే గ్యాస్ట్రిక్ సమస్య బాధ అంతగా తగ్గిపోతుంది. ఈ సమస్యతో బాధపడేవారు ప్రోబయాటిక్, ప్రిబయాటిక్ ఆహార పదార్థాలు తీసుకోవడం మరియు సరైన సమయానికి భోజనం తీసుకుంటూ ఉండడం వల్ల ఈ గ్యాస్ట్రిక్ సమస్య బారిన పడకుండా చూసుకోవచ్చు.

ఉదరంలో వచ్చే సమస్యలు, ప్రేగు సంబంధిత ఇన్ఫెక్షన్లు మరియు ఇంటెస్టినల్ బ్లాక్స్, IBS (ఇరిటబుల్ బవెల్ సిండ్రోమ్) వంటి మొదలైన వ్యాధులతో కూడా రావచ్చు. వెంటనే వైద్యుడిని సంప్రదించి తగు రకాలైన చికిత్సలను పొందగలరు.

గ్యాస్ట్రిక్ సమస్యలు రకాలు

గ్యాస్ట్రిక్ సమస్యలు సాధారణంగా ఎదురయ్యే ఆరోగ్య సమస్యలు. ఈ క్రింద కొన్ని సాధారణ గ్యాస్ట్రిక్ సమస్యలను మరియు వాటి యొక్క లక్షణాలను వివరంగా చూద్దాం:

• యాసిడ్ రిఫ్లక్స్ / GERD (గ్యాస్ట్రోఈసోఫేజియల్ రిఫ్లక్స్ డిసీజ్): దీనిని “గుండెల్లో మంట” అని కూడా అంటారు. భోజనం చేసిన తర్వాత లేదా రాత్రిపూట కడుపులో ఉత్పత్తి అయ్యే ఆమ్లం అన్నవాహికలోకి తిరిగి ప్రవహించడం వల్ల ఛాతీలో మంటగా అనిపిస్తుంది.
• అజీర్ణం (డిస్పెప్సియా): ఆహారం తీసుకున్న తర్వాత కడుపు పైభాగంలో నిండినట్లు, అసౌకర్యంగా లేదా మంటగా అనిపించడం. తరచుగా కడుపు ఉబ్బరం, గ్యాస్ లేదా వికారంతో కూడి ఉంటుంది.
• గ్యాస్ట్రైటిస్: కడుపు లోపలి పొర వాపుకు గురికావడం. దీనివల్ల కడుపు నొప్పి, వికారం, వాంతులు మరియు కడుపు నిండినట్లు అనిపించడం వంటివి జరుగుతాయి.
• పెప్టిక్ అల్సర్లు: కడుపు లోపలి పొర (గ్యాస్ట్రిక్ అల్సర్) లేదా చిన్న ప్రేగుల పైభాగంలో (డుయోడెనల్ అల్సర్) ఏర్పడే పుండ్లు. వీటివల్ల కడుపులో మంటతో కూడిన నొప్పి వస్తుంది.
• ఇరిటబుల్ బోవెల్ సిండ్రోమ్ (IBS): ఇది పెద్ద ప్రేగులను ప్రభావితం చేసే దీర్ఘకాలిక సమస్య. దీనివల్ల పొత్తికడుపు నొప్పి, తిమ్మిర్లు, కడుపు ఉబ్బరం, గ్యాస్ మరియు మలబద్ధకం లేదా విరేచనాలు వంటివి కనిపిస్తాయి.
• మలబద్ధకం: మల విసర్జన అరుదుగా ఉండటం లేదా మల విసర్జన కష్టంగా మారడం. తరచుగా పొత్తికడుపులో అసౌకర్యంతో కూడి ఉంటుంది.
• విరేచనాలు: పల్చటి, నీళ్ల విరేచనాలు, తరచుగా ఎక్కువసార్లు రావడం. ఇవి తాత్కాలికంగా (అక్యూట్) లేదా దీర్ఘకాలికంగా (క్రానిక్) ఉండవచ్చు.
• కడుపు ఉబ్బరం మరియు గ్యాస్: జీర్ణవ్యవస్థలో అధికంగా గ్యాస్ పేరుకుపోవడం వల్ల కడుపు నిండినట్లు, బిగుసుకుపోయినట్లు లేదా వాచినట్లు అనిపించడం. తరచుగా తేన్పులు లేదా అపానవాయువుతో కూడి ఉంటుంది.
• వికారం మరియు వాంతులు: అనారోగ్యంగా అనిపించడం మరియు వాంతి చేసుకునే కోరిక కలగడం (వికారం). కడుపులోని పదార్థాలను బలవంతంగా బయటకు పంపడం (వాంతులు). ఇవి వివిధ గ్యాస్ట్రిక్ సమస్యలకు లేదా ఇతర పరిస్థితులకు లక్షణాలు కావచ్చు.
• హెచ్. పైలోరీ ఇన్ఫెక్షన్: కడుపులో సాధారణంగా కనిపించే ఒక బ్యాక్తీరియల్ ఇన్ఫెక్షన్. ఇది దీర్ఘకాలిక వాపుకు కారణమై, గ్యాస్ట్రైటిస్, పెప్టిక్ అల్సర్లు మరియు కడుపు క్యాన్సర్ ప్రమాదాన్ని పెంచుతుంది.

పదేపదే గ్యాస్ట్రిక్ సమస్యలు ఇబ్బంది పెడుతున్నాయా?

గ్యాస్ట్రిక్ సమస్యలకు వైద్యుడిని ఎప్పుడు సంప్రదించాలి?

గ్యాస్ట్రిక్ సమస్యలు (జీర్ణకోశ సమస్యలు) చాలా సాధారణం. చిన్నపాటి అజీర్ణం లేదా గ్యాస్ వంటివి సాధారణంగా ఇంటి చిట్కాలతో లేదా జీవనశైలి మార్పులతో తగ్గిపోతాయి. అయితే, కొన్నిసార్లు ఈ లక్షణాలు మరింత తీవ్రమైన అంతర్లీన ఆరోగ్య సమస్యలకు సంకేతం కావచ్చు. మీ జీర్ణ ఆరోగ్యాన్ని నిర్లక్ష్యం చేయకుండా, ఎప్పుడు వైద్య నిపుణుడిని సంప్రదించాలో తెలుసుకోవడం చాలా ముఖ్యం. సరైన సమయంలో వైద్య సహాయం తీసుకోవడం వల్ల పెద్ద సమస్యలను నివారించవచ్చు.

ఈ కింది సందర్భాలలో మీరు గ్యాస్ట్రోఎంటరాలజిస్ట్ ను సంప్రదించాలి:

• లక్షణాలు దీర్ఘకాలంగా ఉంటే : మీ గ్యాస్ట్రిక్ లక్షణాలు (గుండెల్లో మంట, అజీర్ణం, కడుపు నొప్పి, ఉబ్బరం) కొన్ని వారాలకు మించి తగ్గకుండా, నిరంతరంగా కొనసాగుతుంటే.
• తీవ్రమైన నొప్పి ఉంటే : కడుపులో లేదా ఛాతీలో తీవ్రమైన, తగ్గని నొప్పి వస్తుంటే. ఈ నొప్పి మీ రోజువారీ కార్యకలాపాలకు అంతరాయం కలిగిస్తుంటే.
• మింగడంలో ఇబ్బంది లేదా నొప్పి ఉంటే : ఆహారం మింగడానికి కష్టంగా అనిపిస్తే (డిస్‌ఫాజియా) లేదా మింగేటప్పుడు నొప్పి వస్తుంటే.
• అధికంగా బరువు తగ్గితే : ఆహారపు అలవాట్లలో మార్పు లేకుండా లేదా ప్రయత్నించకుండానే మీరు బరువు తగ్గడం గమనిస్తే.
• పదేపదే వాంతులు లేదా రక్తపు వాంతులు ఉంటే : తరచుగా వాంతులు అవుతుంటే, లేదా వాంతుల్లో రక్తం (ఎరుపు లేదా కాఫీ రంగులో) కనిపిస్తే.
• నల్లటి లేదా రక్తపు మలం ఉంటే : మలం రంగు నల్లగా, జిగురుగా ఉంటే (మెలీనా), లేదా మలంలో రక్తం కనిపిస్తే.
• ఆకలి తీవ్రంగా తగ్గిపోతే : సాధారణంగా ఆకలి వేయకపోవడం లేదా ఆహారం పట్ల విముఖత ఏర్పడితే.
• రక్తహీనత లక్షణాలు ఉంటే : అలసట, బలహీనత, శ్వాస తీసుకోవడంలో ఇబ్బంది వంటి రక్తహీనత లక్షణాలు కనిపిస్తే.
• రాత్రిపూట తీవ్రమైన లక్షణాలు కనిపిస్తే : రాత్రిపూట నిద్రలేవాల్సి వచ్చేంత తీవ్రమైన గుండెల్లో మంట లేదా కడుపు నొప్పి వస్తుంటే.

ఈ లక్షణాలలో ఏవి కనిపించినా, ఆలస్యం చేయకుండా వైద్యుడిని సంప్రదించి, సరైన నిర్ధారణ మరియు చికిత్స తీసుకోవడం మీ ఆరోగ్యానికి అత్యవసరం.

ముగింపు

గ్యాస్ట్రిక్ సమస్యలు కేవలం తాత్కాలిక అసౌకర్యం కావు, అవి మీ రోజువారీ జీవితాన్ని, ఆరోగ్యాన్ని గణనీయంగా ప్రభావితం చేయగలవు. సరైన ఆహారపు అలవాట్లు, జీవనశైలి మార్పులు మరియు మానసిక ఒత్తిడిని తగ్గించుకోవడం ద్వారా ఈ సమస్యలను చాలా వరకు నియంత్రించవచ్చు. అయితే, లక్షణాలు దీర్ఘకాలికంగా ఉన్నా, తీవ్రంగా మారినా, లేదా పైన చెప్పిన ప్రమాద సంకేతాలు కనిపించినా ఆలస్యం చేయకుండా వైద్య నిపుణులను సంప్రదించడం చాలా ముఖ్యం. మీ జీర్ణ ఆరోగ్యం పట్ల శ్రద్ధ వహించడం భవిష్యత్తులో పెద్ద సమస్యలను నివారిస్తుంది.

హైదరాబాద్‌లోని యశోద హాస్పిటల్స్ గ్యాస్ట్రిక్ సమస్యలతో బాధపడేవారికి సమగ్రమైన చికిత్సను అందిస్తుంది. ఇక్కడ అత్యంత అనుభవజ్ఞులైన గ్యాస్ట్రోఎంటరాలజిస్టులు మరియు ఆధునిక సాంకేతిక సౌకర్యాలు అందుబాటులో ఉన్నాయి. ఎసిడిటీ, అజీర్ణం నుండి అల్సర్లు, IBS వంటి సంక్లిష్ట సమస్యల వరకు, యశోద నిపుణులు ఖచ్చితమైన నిర్ధారణ మరియు వ్యక్తిగతీకరించిన చికిత్సా ప్రణాళికలతో పేషెంటులకు ఉత్తమ ఫలితాలను అందిస్తారు. మీ జీర్ణ ఆరోగ్య సమస్యలకు పరిష్కారం కోసం యశోద హాస్పిటల్స్‌ను సంప్రదించవచ్చు.

మీ ఆరోగ్య సంరక్షణ గురించి ఏవైనా సందేహాలు ఉన్నాయా? సహాయం చేయడానికి మేము సిద్దంగా ఉన్నాము! మా అనుభవంతులైన నిపుణుల సలహా కొరకు +918929967127 కి కాల్ చేయగలరు.

References

• Gas and gas pains
  https://www.mayoclinic.org/diseases-conditions/gas-and-gas-pains/symptoms-causes/syc-20372709

About Author –

Dr. D. S. Sai Babu, MS, FSGE (NIMS), FMAS, FBMS, Dip. MAS (Minimal Access Surgery), FACS (USA)