రోసేసియా : కారణాలు, లక్షణాలు, చికిత్స, నివారణ

రోసేసియా అంటే ఏమిటి ?

మన ముఖంపై మొటిమలు రావడం చాలా సహజమైన విషయం. ఈ మొటిమలు కొంత సమయానికి వాటంతట అవే తగ్గిపోతాయి. మొటిమలు ఉన్న సమయంలో కొంత నొప్పి మరియు చిరాకుగా అనిపించవచ్చు. అయితే కొంతమందిలో ముఖంపై ముఖ్యంగా చెంపల మీద ప్రదేశం అంతా ఎర్రగా కనిపిస్తుంది. ఇది సాధారణ మొటిమల లాగా కాకుండా ముఖంపై ఏర్పడిన పొక్కులు అన్నీ ఎర్రగా ఉంటాయి. ఈ పరిస్థితిని రోసేసియా అంటారు, దీనివల్ల ముఖంపై, ముఖ్యంగా బుగ్గలు, ముక్కు, గడ్డం మరియు నుదురుపై ఎరుపుదనం, చిన్న చిన్న ఎర్రటి గడ్డలు లేదా చీముతో కూడిన మొటిమలు వస్తాయి. ఈ సమస్య ఉన్నవారిలో చర్మం కింద ఉన్న రక్తనాళాలు స్పష్టంగా కనిపిస్తాయి.

రోసేసియా కారణాలు

రోసేసియాకు ఖచ్చితమైన కారణం ఇంకా స్పష్టంగా తెలియదు, అయితే రోసేసియాను ప్రేరేపించే లేదా దాని లక్షణాలను తీవ్రతరం చేసే కారకాలు ఇక్కడ వివరంగా తెలుసుకుందాం.

• జన్యుపరమైన కారణాలు : రోసేసియా అనేది కుటుంబంలో ఒకరి నుంచి మరొకరికి సంక్రమించే అవకాశం ఉంది. మీ కుటుంబంలో ఎవరికైనా ఈ సమస్య ఉంటే, మీకు కూడా వచ్చే ప్రమాదం ఎక్కువగా ఉంటుంది. అయితే ఇది జన్యుపరంగా వచ్చే అవకాశం ఉంది కానీ అంటువ్యాధి కాదు.
• చర్మం కింద రక్తనాళాల సమస్యలు : రోసేసియా ఉన్నవారిలో ముఖంపై ఉండే రక్తనాళాలు సులభంగా ఉబ్బి, ముఖం ఎర్రబడటానికి కారణమవుతాయి. ఈ రక్తనాళాలు ఎందుకు ఇలా స్పందిస్తాయో స్పష్టంగా తెలియదు, కానీ ఇది రోసేసియాకు ఒక ముఖ్యమైన కారణం.
• రోగనిరోధక వ్యవస్థ ప్రతిస్పందన : రోసేసియా ఉన్నవారిలో రోగనిరోధక వ్యవస్థ అతిగా ప్రతిస్పందిస్తుంది. శరీరంలో ఉండే కొన్ని సూక్ష్మక్రిములు లేదా ప్రోటీన్లకు రోగనిరోధక వ్యవస్థ అనవసరంగా స్పందించడం వల్ల చర్మంపై వాపు, ఎరుపుదనం వస్తాయి.
• డెమోడెక్స్ ఫాలికులోరం : డెమోడెక్స్ ఫాలికులోరం అనే ఒక చిన్న పురుగు సాధారణంగా మన చర్మంపై ఉంటుంది. ఇది సాధారణంగా హానికరం కాదు. కానీ రోసేసియా ఉన్నవారిలో ఈ పురుగులు సాధారణం కంటే ఎక్కువగా ఉంటాయి. ఈ పురుగులకు ప్రతిస్పందనగా రోగనిరోధక వ్యవస్థ ప్రతిస్పందించి, రోసేసియా లక్షణాలను ప్రేరేపిస్తుంది.
• వాతావరణ కారకాలు : సూర్యరశ్మికి ఎక్కువగా గురికావడం రోసేసియా లక్షణాలను తీవ్రతరం చేస్తుంది. వాతావరణంలో అకస్మాత్తుగా వచ్చే మార్పులు, వేడి పదార్థాలు లేదా చలిగాలి వల్ల కూడా ఈ సమస్య తీవ్రమవుతుంది.
• జీవనశైలి మరియు ఆహారపు అలవాట్లు::
  • మసాలాలు మరియు వేడి పదార్థాలు: కారంగా ఉండే ఆహారాలు, వేడి పదార్థాలు లేదా పానీయాలు తీసుకోవడం వల్ల ముఖం ఎర్రబడవచ్చు.
  • ఆల్కహాల్ మరియు కెఫిన్: ఆల్కహాల్ మరియు కెఫిన్ కూడా రోసేసియా లక్షణాలను ప్రేరేపించవచ్చు.
  • ఒత్తిడి : తీవ్రమైన ఒత్తిడి వల్ల హార్మోన్ల మార్పులు జరిగి రోసేసియా లక్షణాలు తీవ్రమవుతాయి.

రోసేసియా రకాలు

సాధారణంగా రోసేసియాలో నాలుగు ప్రధాన రకాలు ఉంటాయి, ఒకే వ్యక్తిలో ఒకటి కంటే ఎక్కువ రకాలు కనిపించవచ్చు:

1. ఎరిథెమటోటెలాంజియెక్టాటిక్ రోసేసియా (Erythematotelangiectatic Rosacea) : ఇది చాలా సాధారణ రకం. ముఖం ఎర్రబడటం, ముఖంపై కనిపించే రక్తనాళాలు (టెలాంగియెక్టేసియా), దురద లేదా మంట దీని ప్రధాన లక్షణాలు.
2. పాపులోపస్టులర్ రోసేసియా (Papulopustular Rosacea) : ఇది మొటిమల మాదిరిగా కనిపించే రోసేసియా. ముఖం ఎర్రబడటంతో పాటు చిన్న ఎర్రటి గడ్డలు లేదా చీముతో కూడిన మొటిమలు వస్తాయి.
3. ఫైమటస్ రోసేసియా (Phymatous Rosacea) : ఇది చాలా అరుదైన మరియు తీవ్రమైన రకం. దీనివల్ల చర్మం మందంగా, గట్టిగా మారుతుంది. ముఖ్యంగా ముక్కు ఉబ్బడం (రైనోఫైమా) వంటి లక్షణాలు దీనిలో కనిపిస్తాయి.
4. ఆక్యులర్ రోసేసియా (Ocular Rosacea) : ఇది చర్మాన్ని కాకుండా కళ్ళను ప్రభావితం చేస్తుంది. కళ్ళు ఎర్రబడటం, దురదగా ఉండటం, పొడిబారడం, మంట మరియు కనురెప్పల వాపు వంటి లక్షణాలు ఉంటాయి.

రోసేసియా యొక్క ప్రధాన లక్షణాలు

రోసేసియా అనేది చర్మానికి వచ్చే ఒక దీర్ఘకాలిక సమస్య. దీని ప్రధాన లక్షణం ముఖంపై నిరంతర ఎరుపుదనం. దీని లక్షణాలు ఒక్కొక్కరిలో ఒక్కోలా ఉండవచ్చు మరియు అవి కాలక్రమేణా తీవ్రంగా మారవచ్చు.

• ముఖం ఎరుపుగా ఉండడం : ముఖంపై, ముఖ్యంగా ముక్కు మరియు బుగ్గలు తరచుగా ఎర్రబడతాయి. కొన్నిసార్లు ఇది నుదురు మరియు గడ్డంపై కూడా వ్యాపిస్తుంది. ఈ ఎరుపుదనం కొన్నిసార్లు వచ్చి, మళ్ళీ పోవచ్చు, కానీ వ్యాధి తీవ్రమైనప్పుడు ఇది శాశ్వతంగా ఉంటుంది.
• ఎర్రటి గడ్డలు మరియు మొటిమలు : రోసేసియా వల్ల ముఖంపై చిన్న చిన్న ఎర్రటి గడ్డలు లేదా మొటిమలు రావచ్చు. ఇవి సాధారణ మొటిమల మాదిరిగానే కనిపిస్తాయి, కానీ వాటిలో బ్లాక్‌హెడ్స్ ఉండవు. కొన్నిసార్లు ఈ మొటిమలలో చీము కూడా నిండి ఉంటుంది.
• కనిపించే రక్తనాళాలు : ముక్కు మరియు బుగ్గలపై చర్మం కింద ఉండే చిన్న రక్తనాళాలు స్పష్టంగా కనిపిస్తాయి. ఇవి సన్నని ఎర్రటి లేదా ఊదా రంగు రేఖలుగా ఉంటాయి.
• వాపు మరియు పొడిబారడం: ముఖంపై చర్మం వాపుగా మరియు పొడిగా ఉంటుంది. దీనివల్ల ముఖం స్పర్శకు సున్నితంగా మారుతుంది.
• కంటి సమస్యలు : కొంతమంది రోసేసియా రోగులలో కళ్ళు ఎర్రబడటం, పొడిబారడం, దురదగా అనిపించడం, కనురెప్పల వాపు వంటి లక్షణాలు కనిపిస్తాయి. దీనిని ఆక్యులర్ రోసేసియా అంటారు.
• ముక్కు వాపు : ఇది రోసేసియా యొక్క తీవ్రమైన మరియు అరుదైన లక్షణం. ముఖ్యంగా పురుషులలో ఈ లక్షణం ఎక్కువగా కనిపిస్తుంది. ముక్కు చర్మం మందంగా మరియు ఉబ్బి, దాని ఆకారం మారుతుంది.
• ముఖంపై మంట : రోసేసియా సమస్య ఉన్నవారిలో ముఖంపై మంటగా అనిపించవచ్చు. ఎండలోకి వెళ్ళినప్పుడు లేదా ఉష్ణోగ్రతలు ఎక్కువగా ఉన్నప్పుడు ఈ మంట మరింత తీవ్రమవుతుంది.

రోసేసియా చికిత్సా పద్ధతులు

రోసేసియా లక్షణాలను సమర్థవంతంగా నియంత్రించడానికి అనేక చికిత్సలు అందుబాటులో ఉన్నాయి. చికిత్స పద్ధతులు రోసేసియా రకం, దాని తీవ్రత మరియు పేషేంట్ యొక్క వ్యక్తిగత లక్షణాలపై ఆధారపడి ఉంటాయి.

1. మందులు:
   • సాధారణ మందులు: చర్మంపై నేరుగా ఉపయోగించే క్రీములు లేదా జెల్ ముఖంపై ఎరుపుదనం, వాపు మరియు మొటిమలను తగ్గిస్తాయి.బ్రిమోనిడిన్ రక్తనాళాలను ఇరుకుగా చేసి, ముఖంపై ఎరుపుదనమును తాత్కాలికంగా తగ్గిస్తుంది. మెట్రోనిడజోల్ మరియు అజలైక్ యాసిడ్ వాపును మరియు మొటిమలను తగ్గిస్తాయి. రోసేసియా వలన నొప్పి తీవ్రమైన సందర్భాల్లో యాంటీబయాటిక్స్ ను డాక్టర్లు సూచించవచ్చు. డాక్సీసైక్లిన్ లాంటి యాంటీబయాటిక్స్ వాపును తగ్గించడంలో సహాయపడతాయి.
2. లేజర్ మరియు లైట్ థెరపీ :
   • లేజర్ చికిత్స ముఖంపై కనిపించే ఉబ్బిన రక్తనాళాలను మరియు ఎరుపుదనమును తగ్గించడంలో చాలా ప్రభావవంతంగా ఉంటుంది.
   • ఈ చికిత్సలో, లేజర్ లేదా తీవ్రమైన పల్సెడ్ లైట్ ను ప్రభావిత చర్మంపై ప్రసరింపజేస్తారు. ఈ కాంతి రక్తనాళాల వలన కలిగే ఎరుపుదనాన్ని తగ్గిస్తుంది. ఇది సురక్షితమైనది మరియు ఈ చికిత్స వలన నొప్పి కలగదు.
3. ముక్కు సమస్యకు చికిత్స :
   • రోసేసియా వల్ల ముక్కు ఉబ్బినట్లయితే, ఈ సమస్యను లేజర్ చికిత్స లేదా శస్త్రచికిత్స ద్వారా సరిచేయవచ్చు.

రోసేసియాకు చికిత్స చేయకపోతే అది తీవ్రం కావచ్చు. కాబట్టి మీకు రోసేసియా సమస్య ఉన్నట్లయితే డెర్మటాలజిస్ట్ ను సంప్రదించి, సరైన చికిత్స ప్రణాళికను రూపొందించుకోవడం చాలా ముఖ్యం. రోసేసియా చికిత్స ముఖ్యంగా ట్రిగ్గరింగ్ ఫ్యాక్టర్స్ ను తగ్గించడానికి చేయాల్సి ఉంటుంది. తీవ్రత సాధారణంగా ఉంటే మందులు లేదా ఆయింట్మెంట్లతో సరిపోతుంది. తీవ్రత ఎక్కువగా ఉండి ముక్కు వాపుకు గురైతే శస్త్రచికిత్స అవసరం అవుతుంది.

రోసేసియాను నివారించే పద్ధతులు

రోసేసియాను పూర్తిగా నివారించడం కష్టం, ఎందుకంటే దీనికి ఖచ్చితమైన కారణం తెలియదు. కానీ దాని లక్షణాలు బయటపడకుండా లేదా అవి తీవ్రం కాకుండా కొన్ని జాగ్రత్తలు తీసుకోవడం ద్వారా రోసేసియాను సమర్థవంతంగా నియంత్రించవచ్చు.

1. ట్రిగ్గర్స్‌ను గుర్తించడం మరియు నివారించడం:
   రోసేసియా లక్షణాలను ప్రేరేపించే అంశాలను గుర్తించి, వాటిని నివారించడం చాలా ముఖ్యం. సాధారణ ట్రిగ్గర్స్ ఇక్కడ ఉన్నాయి:
   • వేడి: సూర్యరశ్మి, వేడి వాతావరణం, హాట్ వాటర్ బాత్ లేదా సౌనా.
   • ఆహారం: మసాలాలు ఎక్కువగా ఉండే ఆహారం, వేడి పదార్థాలు లేదా పానీయాలు, ఆల్కహాల్.
   • మానసిక ఒత్తిడి: ఒత్తిడి వల్ల కూడా రోసేసియా తీవ్రమవుతుంది. యోగా లేదా ధ్యానం వంటివి ఒత్తిడిని తగ్గించడానికి సహాయపడతాయి.
2. సూర్యరశ్మి నుండి చర్మాన్ని రక్షించుకోవడం:
   • రోసేసియాకు సూర్యరశ్మి ఒక ప్రధాన ట్రిగ్గర్. కాబట్టి బయటికి వెళ్ళేటప్పుడు SPF 30 లేదా అంతకంటే ఎక్కువ ఉన్న సన్‌స్క్రీన్‌ను ఉపయోగించాలి.
   • టోపీ, గొడుగు లేదా సన్ గ్లాసెస్ వంటివి వాడటం వల్ల సూర్యరశ్మి ప్రభావం తగ్గుతుంది.
3. సున్నితమైన చర్మ సంరక్షణ:
   • రోసేసియా ఉన్న చర్మం చాలా సున్నితంగా ఉంటుంది. కాబట్టి సువాసనలు లేని, సున్నితమైన చర్మ సంరక్షణ ఉత్పత్తులను వాడాలి.
   • ముఖాన్ని రుద్దడం, కఠినమైన సబ్బులు వాడటం మానుకోవాలి. సున్నితమైన క్లెన్సర్‌లను ఉపయోగించి చర్మాన్ని శుభ్రం చేసుకోవాలి.
4. ఆహార నియమాలు:
   • మసాలాలు, వేడి పదార్థాలు మరియు ఆల్కహాల్‌ను తగ్గించాలి. ఇవి రక్తనాళాలను విస్తరించి ముఖం ఎర్రబడటానికి కారణమవుతాయి.
   • ఎక్కువ నీరు తాగడం వల్ల చర్మం హైడ్రేటెడ్‌గా ఉంటుంది.
5. వైద్య సలహా తీసుకోవడం:
   • రోసేసియా లక్షణాలు కనిపిస్తే, చర్మ వైద్యుడిని సంప్రదించడం చాలా ముఖ్యం. డాక్టర్ మీ పరిస్థితిని అంచనా వేసి, దానికి తగిన మందులను లేదా చికిత్సను సూచిస్తారు.

ఈ జాగ్రత్తలు తీసుకోవడం వల్ల రోసేసియా పూర్తిగా నయం కాకపోయినా, దాని లక్షణాలను నియంత్రించి సాధారణ జీవితాన్ని గడపవచ్చు.

వైద్యులను ఎప్పుడు సంప్రదించాలి?

ఒకవేళ మీరు రోసేసియా సమస్యతో బాధ పడుతున్నట్లు అయితే రోసేసియా వలన నొప్పి లేదా మంట కలగకుండా జీవనశైలి మార్పులతో పాటుగా ఇక్కడ వివరించిన జాగ్రత్తలు పాటించడం అవసరం. అయితే మీరు జాగ్రత్తలు పాటిస్తున్నప్పటికి కూడా ముఖంపై నొప్పి మంట మరియు నొప్పి కలుగుతుంటే డెర్మటాలజిస్ట్ ను సంప్రదించడం అవసరం. పేషేంట్ యొక్క లక్షణాలను బట్టి వారికి అవసరమైన చికిత్సను డాక్టర్ సూచిస్తారు. యశోద హాస్పిటల్స్ అనుభజ్ఞులైన డెర్మటాలజిస్ట్ రోసేసియా సమస్యకు అత్యుత్తమ చికిత్స అందించగలరు. మీకు రోసేసియా సమస్య ఉన్నట్లు అయితే చికిత్స కోసం వెంటనే యశోద వైద్య నిపుణులను సంప్రదించండి.

మీ ఆరోగ్య సంరక్షణ గురించి ఏవైనా సందేహాలు ఉన్నాయా? సహాయం చేయడానికి మేము సిద్దంగా ఉన్నాము! మా అనుభవంతులైన నిపుణుల సలహా కొరకు +918065906165 కి కాల్ చేయగలరు.