గుండె వైఫల్యం : కారణాలు, ప్రమాద కారకాలు, లక్షణాలు, చికిత్స, జాగ్రత్తలు

గుండె వైఫల్యం అంటే ఏమిటి?

గుండె మన శరీరంలో అత్యంత ముఖ్యమైన అవయవం. మన శరీరంలో ఉన్న అన్ని అవయవాలకు రక్తాన్ని సరఫరా చేస్తుంది. ఈ పని చేయడానికి గుండె నిరంతరం కొట్టుకుంటూనే ఉంటుంది. అయితే మనం చేసే పనులను బట్టి కొన్నిసార్లు గుండె కొట్టుకునే వేగం పెరగవచ్చు. సాధారణంగా మన గుండె నిమిషానికి 60 నుండి 100 సార్లు కొట్టుకుంటుంది. వ్యాయామం చేసినప్పుడు గుండె వేగం పెరగడాన్ని మనం గమనించవచ్చు, తర్వాత కొంత సమయానికి సాధారణ స్థాయికి వచ్చేస్తుంది. అయితే మన జీవనశైలి, ఆహారపు అలవాట్ల కారణంగా ప్రస్తుతం అనేక మందిలో గుండె సమస్యలు ఏర్పడుతున్నాయి, వీటిలో గుండె వైఫల్యం కూడా ఒకటి.
గుండె వైఫల్యం అంటే గుండె పనిచేయడం ఆగిపోవడం అని కాదు. గుండె పనిచేసే సామర్ధ్యం తగ్గడాన్ని గుండె వైఫల్యం అంటారు. అంటే శరీరానికి కావాల్సిన రక్తాన్ని గుండె అందించలేక పోవడాన్ని గుండె వైఫల్యంగా వివరించవచ్చు. గుండె వైఫ్యలం గురించి పూర్తి వివరాలు ఇక్కడ తెలుసుకుందాం.

గుండె వైఫల్యం లక్షణాలు

గుండె వైఫల్యం అనేది గుండె సరిగా పనిచేయలేకపోవడం వల్ల వచ్చే ఒక తీవ్రమైన పరిస్థితి. ఈ పరిస్థితిలో గుండె శరీరానికి అవసరమైన రక్తాన్ని సమర్థవంతంగా పంప్ చేయలేదు. గుండె వైఫల్యం యొక్క లక్షణాలు నెమ్మదిగా మొదలై, క్రమంగా తీవ్రమవుతాయి. అవి తరచుగా ఇతర వ్యాధుల లక్షణాలతో పోలి ఉంటాయి.

• శ్వాస ఆడకపోవడం: ఇది గుండె ఫల్యంలో కనిపించే అత్యంత సాధారణ లక్షణం. ప్రారంభంలో శారీరక శ్రమ చేసినప్పుడు మాత్రమే శ్వాస ఆడదు, కానీ పరిస్థితి తీవ్రమైనప్పుడు, విశ్రాంతి తీసుకుంటున్నప్పుడు కూడా శ్వాస తీసుకోవడం కష్టమవుతుంది. ముఖ్యంగా రాత్రి పడుకున్నప్పుడు శ్వాస ఆడకపోవడం గుండె వైఫల్యం యొక్క ప్రధాన లక్షణం.
• ఛాతీ నొప్పి : గుండె వైఫల్యం సమస్య ఉన్నవారిలో గుండె పనితీరు మందగిస్తుంది. దీనివలన శరీరంలోని అన్ని అవయవాలకు అవసరమైన రక్తం అందకపోవడంతో గుండె మీద ఒత్తిడి కలుగుతుంది. దీనివలన గుండె వేగంగా కొట్టుకోవడం మరియు ఛాతీ నొప్పి కూడా కలగవచ్చు.
• అలసట మరియు బలహీనత: గుండె, శరీరానికి తగినంత రక్తాన్ని పంప్ చేయలేకపోవడం వల్ల కండరాలకు తగినంత ఆక్సిజన్ మరియు పోషకాలు అందవు. దీనివల్ల తరచుగా అలసిపోవడం మరియు బలహీనంగా అనిపించడం వంటివి జరుగుతాయి.
• కాళ్లు, పాదాలు మరియు చీలమండల వాపు: గుండె రక్తాన్ని సరిగా పంప్ చేయలేకపోవడం వల్ల రక్తం మరియు ద్రవాలు శరీరంలోని కింది భాగాలలో (కాళ్లు, పాదాలు మరియు చీలమండలు) పేరుకుపోతాయి. ఈ వాపును ఎడిమా (Edema) అని అంటారు.
• వేగవంతమైన లేదా క్రమరహిత గుండె కొట్టుకోవడం: బలహీనపడిన గుండె ఆ లోపాన్ని భర్తీ చేయడానికి వేగంగా లేదా క్రమరహితంగా కొట్టుకుంటుంది.
• పొడి దగ్గు: ద్రవాలు ఊపిరితిత్తులలో పేరుకుపోవడం వల్ల దీర్ఘకాలికంగా పొడి దగ్గు లేదా కఫంతో కూడిన దగ్గు వస్తుంది. పడుకున్న సమయంలో దగ్గు తీవ్రంగా వస్తుంది.
• ఆకలి లేకపోవడం: జీర్ణ వ్యవస్థకు తగినంత రక్తం అందకపోవడం వల్ల జీర్ణక్రియ మందగించి, ఆకలి తగ్గుతుంది

ఈ లక్షణాలు కనిపించినప్పుడు వెంటనే వైద్యుడిని సంప్రదించి చికిత్స తీసుకోవడం చాలా ముఖ్యం.

గుండె వైఫల్యానికి కారణాలు

గుండె వైఫల్యానికి అనేక కారణాలు ఉన్నాయి:

• కరోనరీ ఆర్టరీ డిసీజ్ (CAD): కరోనరీ ఆర్టరీ డిసీజ్ అంటే గుండెకు రక్తాన్ని సరఫరా చేసే రక్తనాళాలు ఇరుకుగా మారడం లేదా గట్టిపడటం. దీనివల్ల గుండె కండరాలకు తగినంత ఆక్సిజన్ మరియు పోషకాలు అందవు.ధమనుల లోపల కొలెస్ట్రాల్, కొవ్వు మరియు ఇతర పదార్థాలతో కూడిన ఫలకాలు (Plaque) పేరుకుపోవడం వల్ల ఈ వ్యాధి వస్తుంది. ఈ ఫలకాలు గట్టిపడి, ధమనులను ఇరుకుగా చేస్తాయి. దీనివల్ల రక్త ప్రసరణ తగ్గిపోతుంది.
• గుండెపోటు: గుండెపోటు వచ్చినప్పుడు గుండె కండరాలు దెబ్బతిని, పంపింగ్ సామర్థ్యం తగ్గుతుంది. ఫలితంగా గుండె పనిచేసే సామర్ధ్యం తగ్గవచ్చు.
• అధిక రక్తపోటు: అధిక రక్తపోటు అంటే రక్తనాళాల గోడలపై రక్తం అధిక ఒత్తిడిని కలిగించడం. దీనిని హైపర్‌టెన్షన్ (Hypertension) అని అంటారు. గుండె రక్తాన్ని పంప్ చేసినప్పుడు, ఆ రక్తం ధమనులలో ప్రవహిస్తుంది. ఈ ప్రవాహం గోడలపై కలిగించే ఒత్తిడే రక్తపోటు. ఇది ఎక్కువగా ఉన్నప్పుడు, గుండె మరియు రక్తనాళాలపై ఎక్కువ భారం పడుతుంది. రక్తపోటు దీర్ఘకాలికంగా ఉన్నప్పుడు గుండె మీద ఒత్తిడి ఎక్కువగా ఉంటుంది. దీనివలన గుండె వైఫల్యం కలిగే ప్రమాదం ఉంది.
• కవాటాల సమస్యలు: గుండెలో మొత్తం నాలుగు కవాటాలు (వాల్వ్స్) ఉంటాయి. ఇవి గుండె కొట్టుకున్న ప్రతిసారీ తెరుచుకుని, మూసుకుంటూ రక్తాన్ని ముందుకు పంప్ చేస్తాయి. ఒకసారి రక్తం ముందుకు వెళ్లిన తర్వాత, అది వెనక్కి రాకుండా ఈ కవాటాలు మూసుకుంటాయి. గుండె కవాటాలు సరిగా తెరుచుకోకపోవడం లేదా మూసుకుపోకపోవడం వల్ల గుండెపై ఒత్తిడి పెరుగుతుంది.
• మధుమేహం (డయాబెటీస్): అనియంత్రిత మధుమేహం గుండె కండరాల పనితీరును దెబ్బతీస్తుంది. గుండె కండరాలు గట్టిగా లేదా బలహీనంగా మారవచ్చు. దీనిని డయాబెటిక్ కార్డియోమయోపతి అని అంటారు. గుండె పంపింగ్ సామర్థ్యం తగ్గినప్పుడు, అది శరీరానికి అవసరమైన రక్తాన్ని సమర్థవంతంగా సరఫరా చేయలేదు, ఇది కూడా గుండె వైఫల్యానికి ఒక ప్రధాన కారణం.
• గుండె కండరాల వ్యాధులు (కార్డియోమయోపతి): గుండె కండరాలకు వచ్చే వ్యాధులను కార్డియోమయోపతి అని అంటారు. ఇవి గుండె కండరాలను మందంగా, గట్టిగా లేదా బలహీనంగా మారుస్తాయి. దీనికి జన్యుపరమైన కారణాలు, ఇన్ఫెక్షన్లు లేదా కొన్ని రకాల విషపదార్థాలు కారణం కావచ్చు.
• గుండె క్రమరహితంగా కొట్టుకోవడం (అరిథ్మియా): గుండె లయలో సమస్యలు ఉన్నప్పుడు గుండె అసాధారణంగా వేగంగా లేదా నెమ్మదిగా కొట్టుకుంటుంది. ఈ పరిస్థితిని అరిథ్మియా అంటారు. ఇది గుండె పంపింగ్ సామర్థ్యాన్ని తగ్గిస్తుంది, క్రమంగా ఇది గుండె వైఫల్యానికి కారణమయ్యే ప్రమాదం ఉంది.

గుండె వైఫల్యానికి ప్రమాద కారకాలు

గుండె వైఫల్యం సమస్య కలగడానికి వివిధ రకాలైన ప్రమాద కారకాలు ఉన్నాయి. వాటి గురించి ఇక్కడ వివరంగా తెలుసుకుందాం.

• ధూమపానం : సిగరెట్ లేదా పొగాకు అలవాటు ఉన్నవారిలో నికోటిన్ అనే పదార్ధం రక్తంలోకి చేరుకుని రక్తంలో ఆక్సిజన్ స్థాయిలను నిరోధిస్తుంది. దీని వలన రక్తపోటు వచ్చే ప్రమాదం ఉంది. రక్తపోటు క్రమంగా గుండె వైఫల్యానికి కారణం కావచ్చు.
• మద్యపానం : ఆల్కహాల్ తీసుకోవడం వలన మనకు గుండె సమస్యలు మాత్రమే కాకుండా అనేక ఆరోగ్య సమస్యలు కలుగుతాయి. అయితే ఎక్కువగా మరియు దీర్ఘకాలికంగా ఉంటే దీనివలన గుండె కండరాలు బలహీన పడతాయి. రక్తపోటు అధికంగా ఉంటుంది. గుండెలోని భాగాల పరిమాణం పెద్దవిగా చేస్తుంది. ఈ కారణాల వలన గుండె వైఫల్యం కలిగే ప్రమాదం ఎక్కువగా ఉంది.
• ఆహారపు అలవాట్లు : ప్రస్తుతం మనం తీసుకునే ఆహారంలో పోషకాలకంటే రుచికి ఎక్కువ ప్రాధాన్యత ఇస్తున్నాం. దీని ఆధారంగానే ప్రస్తుతం అనేక రకాలైన ఫాస్ట్ ఫుడ్స్ మరియు జంక్ ఫుడ్స్ లో టేస్టింగ్ సాల్ట్ మరియు ఇతర కెమికల్స్ ను కలుపుతున్నారు. ఇలాంటి ఆహారం తరచుగా తీసుకోవడం వలన రక్తపోటు, గుండె సంబంధిత సమస్యలు వచ్చే ప్రమాదం ఎక్కువగా ఉంటుంది.
• ఊబకాయం: సాధారణంగా మనం ఎక్కువ బరువు ఉండడాన్ని మరియు ఊబకాయం ఉండడాన్ని పెద్ద సమస్య లాగా భావించరు. కానీ ఊబకాయం మనకు తెలియకుండా అనేక ఆరోగ్య సమస్యలకు కారణం అవుతుంది. ఊబకాయం ఉన్నవారిలో చెడు కొలెస్ట్రాల్ ఎక్కువగా ఉండే అవకాశం ఉంది. దీని వలన గుండె వైఫల్యం కలిగే ప్రమాదం ఉంది.
• కనీస వ్యాయామం లేకపోవడం: చాలామంది చూడడానికి సన్నగానే ఉన్నామని వ్యాయామం చేయడం మానేస్తారు. అయితే కనీస వ్యాయామం లేదా శారీరక శ్రమ లేకపోవడం వలన రక్తనాళాల్లో చెడు కొలెస్ట్రాల్ అధికంగా పేరుకుపోయే ప్రమాదం ఉంది. ఎంతలావుగా ఉంటే అంత ఎక్కువగా కొలెస్ట్రాల్ ఉంటుందని చాలామందిలో ఒక అపోహ ఉంది. కానీ ఇందులో ఎంతమాత్రం నిజం లేదు. కొలెస్ట్రాల్ సన్నగా ఉన్నవారిలో కూడా ఎక్కువగా ఉండవచ్చు. దీని వలన గుండె వైఫల్యం కలిగే అవకాశం ఎక్కువగా ఉంటుంది.

గుండె వైఫల్యం చికిత్స విధానాలు

గుండె వైఫల్యం అనేది ఒక తీవ్రమైన దీర్ఘకాలిక వ్యాధి. దీనిని పూర్తిగా నయం చేయడం కష్టం. కానీ సరైన చికిత్సతో లక్షణాలను నియంత్రించి, జీవిత నాణ్యతను మెరుగుపరచవచ్చు. చికిత్స విధానం గుండె వైఫల్యానికి గల కారణం, దాని తీవ్రత మరియు రోగి యొక్క మొత్తం ఆరోగ్యంపై ఆధారపడి ఉంటుంది.

1. మందులు:

గుండె వైఫల్యం చికిత్సలో మందులు కీలక పాత్ర పోషిస్తాయి. గుండె వైఫల్యానికి కారణమైన సమస్యను బట్టి డాక్టర్ మందులను సూచిస్తారు.

• ACE ఇన్హిబిటర్స్ మరియు ARBలు : ఈ మందులు రక్తనాళాలను విశ్రాంతి పరుస్తాయి, రక్తపోటును తగ్గిస్తాయి. దీనివల్ల గుండెపై భారం తగ్గుతుంది.
• బీటా బ్లాకర్స్ : ఈ మందులు గుండె కొట్టుకునే వేగాన్ని తగ్గించి, గుండెపై ఒత్తిడిని తగ్గిస్తాయి.
• వాటర్ పిల్స్ : ఇవి మూత్ర ఉత్పత్తిని పెంచి, శరీరంలో పేరుకుపోయిన ద్రవాన్ని తొలగించి, వాపును తగ్గిస్తాయి.
• డిజిటాలిస్ : ఇది గుండె కండరాల సంకోచాన్ని మెరుగుపరిచి, రక్తాన్ని మరింత సమర్థవంతంగా పంప్ చేయడానికి సహాయపడుతుంది.

2. వైద్య పరికరాలు :

కొన్ని తీవ్రమైన సందర్భాలలో గుండెకు సహాయం చేయడానికి లేదా దాని లయను సరిచేయడానికి కొన్ని పరికరాలను అమరుస్తారు.

• పేస్ మేకర్ : గుండె లయ క్రమరహితంగా ఉంటే దీనిని అమరుస్తారు. గుండెలో ఎలక్ట్రికల్ సిగ్నల్స్ ద్వారా గుండె కొట్టుకునే లయ నియంత్రించబడుతుంది. ఈ సిగ్నల్స్ అసాధారణంగా లేదా చాలా నెమ్మదిగా ఉన్నప్పుడు, గుండె సరిగా పంప్ చేయలేదు. పేస్ మేకర్ గుండెలోని అసాధారణ లయను గుర్తించి, అవసరమైనప్పుడు ఎలక్ట్రికల్ సిగ్నల్స్ పంపి, గుండెను సాధారణ లయలో కొట్టుకునేలా చేస్తుంది.
• ఇంప్లాంటబుల్ కార్డియోవర్టర్-డీఫిబ్రిలేటర్ (ICD): ఇది గుండె లయను నిరంతరం పర్యవేక్షించి, అవసరమైనప్పుడు షాక్ ఇచ్చి గుండె లయను సరిచేస్తుంది. తీవ్రమైన గుండె జబ్బులు ఉన్నవారిలో అకస్మాత్తుగా గుండె ఆగిపోవడాన్ని నివారించడానికి ఈ పరికరం ఉపయోగపడుతుంది.

3. శస్త్రచికిత్స:

• కరోనరీ బైపాస్ సర్జరీ : గుండెకు రక్తాన్ని సరఫరా చేసే రక్తనాళాలలో అడ్డంకులు ఏర్పడితే ఈ శస్త్రచికిత్స చేస్తారు. గుండెకు రక్తాన్ని సరఫరా చేసే ధమనులు ఇరుకుగా మారినప్పుడు లేదా పూర్తిగా అడ్డుపడినప్పుడు ఈ శస్త్రచికిత్స చేస్తారు.ఈ ఆపరేషన్లో, శరీరంలోని మరో భాగం నుండి ఆరోగ్యకరమైన రక్తనాళాన్ని (గ్రాఫ్ట్) తీసుకుని, దాన్ని అడ్డుపడిన ధమని పక్కన జత చేస్తారు. దీనివల్ల గుండెకు రక్తం ప్రవహించడానికి ఒక కొత్త మార్గం ఏర్పడుతుంది. ఈ కొత్త మార్గం గుండెకు సరిపడా ఆక్సిజన్ మరియు పోషకాలను అందిస్తుంది.
• గుండె మార్పిడి : అన్ని చికిత్సలు విఫలమైతే, ఒక ఆరోగ్యకరమైన గుండెను మార్పిడి చేస్తారు.

గుండె వైఫల్యం ఉన్నవారు డాక్టర్ సలహా మేరకు క్రమం తప్పకుండా వైద్య పరీక్షలు చేయించుకోవడం, మందులు వాడటం మరియు జీవనశైలి మార్పులు పాటించడం చాలా ముఖ్యం.

గుండె వైఫల్యం నిర్ధారణ పరీక్షలు

గుండె వైఫల్యాన్ని నిర్ధారించడానికి మరియు దాని తీవ్రతను అంచనా వేయడానికి డాక్టర్ అనేక రకాల పరీక్షలను సూచిస్తారు. ఈ పరీక్షలు గుండె యొక్క స్థితి, దాని పంపింగ్ సామర్థ్యం మరియు వైఫల్యానికి గల కారణాలను గుర్తించడంలో సహాయపడతాయి.

1. శారీరక పరీక్ష:డాక్టర్ మీ లక్షణాల గురించి అడిగి తెలుసుకుంటారు. ముఖ్యంగా శ్వాస ఆడకపోవడం, అలసట, కాళ్ల మరియు పాదముల వాపు వంటి లక్షణాలను పరిశీలిస్తారు. అలాగే, గుండె మురళి (heart murmurs) శబ్దాలను వినడానికి స్టెతస్కోప్ ఉపయోగిస్తారు.
2. ఎలెక్ట్రోకార్డియోగ్రామ్:ఈ పరీక్ష గుండెకు ఎలక్ట్రికల్ సిగ్నల్స్ ను రికార్డ్ చేస్తుంది. ఇది గుండె కొట్టుకోవడంలో మార్పులు లేదా గుండెను బలహీనపరిచే సమస్యలను గుర్తించడంలో సహాయపడుతుంది.
3. ఎకో కార్డియోగ్రామ్:ఇది గుండెకు సంబంధించిన ఇమేజింగ్ టెస్ట్ అని అంటారు. ఇది గుండె గదుల పరిమాణం, వాటి ఫంక్షనింగ్ సామర్థ్యం, కవాటాల పనితీరు మరియు గుండె గదుల మధ్యలో లీకేజీలను పరిశీలిస్తుంది. ఈ పరీక్షలో ఈజెక్షన్ ఫ్రాక్షన్ (Ejection Fraction) అనే కొలతను కూడా చూపుతుంది. ఇది గుండె రక్తాన్ని ఎంత సమర్థవంతంగా పంపిస్తుందో తెలియజేస్తుంది.
4. రక్త పరీక్షలు:
   • BNP పరీక్ష: గుండె వైఫల్యం ఉన్నవారిలో ఈ హార్మోన్ స్థాయిలు ఎక్కువగా ఉంటాయి.
   • క్రియాటినిన్ లివర్ ఫంక్షన్ పరీక్షలు: గుండె వైఫల్యం కిడ్నీ మరియు లివర్ పనితీరును ఎలా ప్రభావితం చేస్తుందో తెలుసుకోవడానికి ఈ పరీక్షలు చేస్తారు.
   • రక్తంలో కొలెస్ట్రాల్ మరియు కాల్షియం స్థాయిలు: గుండె వైఫల్యానికి కారణమయ్యే పరిస్థితులను తెలుసుకోవడానికి ఈ పరీక్షలు చేస్తారు.
5. చాతీ ఎక్స్-రే:గుండె పరిమాణం పెరిగిందో లేదో తెలుసుకోవడానికి, ఊపిరితిత్తుల్లో (ద్రవం చేరిందో లేదో) చూడటానికి ఈ పరీక్ష చేస్తారు.
6. హోల్టర్ మానిటర్:ఇది పోర్టబుల్ ECG యంత్రం. దీనిని 24 నుండి 48 గంటల పాటు ధరించి గుండె సాధారణ కాండిషన్లలో రికార్డ్ చేస్తారు.
7. కార్డియాక్ CT స్కాన్ లేదా MRI :
   ఈ అధునాతన పరీక్షలు గుండె మరియు దాని రక్తనాళాల యొక్క వివరణాత్మక చిత్రాలను అందిస్తాయి. గుండెపోటు వల్ల గుండె కండరాలకు ఎంత నష్టం జరిగిందో అంచనా వేయడానికి ఇవి సహాయపడతాయి.

ఈ పరీక్షల ఫలితాల ఆధారంగా, డాక్టర్ గుండె వైఫల్యాన్ని నిర్ధారించి, దానికి తగిన చికిత్సను సూచిస్తారు.

గుండె బలంగా ఉండాలంటే ఏం చేయాలి?

జీవనశైలిలో కొన్ని మార్పులు చేసుకోవడం ద్వారా మరియు సరైన జాగ్రత్తలు తీసుకోవడం ద్వారా గుండె వైఫల్యం నివారించవచ్చు.

1. ఆరోగ్యకరమైన ఆహారం:
   • ఉప్పు తగ్గించడం: ఎక్కువ ఉప్పు తీసుకోవడం వల్ల శరీరంలో ద్రవాలు చేరిపోవడం గుండెపై ఒత్తిడిని పెంచుతుంది. అందుకే ఉప్పు తక్కువగా ఉండే ఆహారాలు ఉపయోగకరం.
   • కొవ్వు పదార్థాలు మరియు పచ్చి వంటకాలు తగ్గించడం: అనారోగ్యకరమైన కొవ్వులు మరియు పచ్చి వంటకాలు గుండె ఆరోగ్యానికి హానికరం. ఇవి కొలెస్ట్రాల్ మరియు కొత్త ప్లాక్‌లు ఏర్పడతాయి, అవి గుండె సమస్యలకు దారితీస్తాయి.
   • పండ్లు మరియు కూరగాయలు: గుండె ఆరోగ్యానికి అవసరమైన విటమిన్లు, ఖనిజపదార్థాలు మరియు యాంటీఆక్సిడెంట్లు పుష్కలంగా లభిస్తాయి.
2. క్రమం తప్పని వ్యాయామం:
   • రోజూ కనీసం 30 నిమిషాలు వ్యాయామం చేయడం వల్ల గుండె కండరాలు బలోపేతం అవుతాయి.
   • నడవడం, సైక్లింగ్ చేయడం, ఈత కొట్టడం వంటివి గుండె ఆరోగ్యానికి మంచివి.
3. బరువు నియంత్రణ:
   • అధిక బరువు ఉన్నవారి గుండెపై ఎక్కువ ఒత్తిడి పడుతుంది. ఆరోగ్యకరమైన బరువును నియంత్రించుకోవడం వల్ల గుండె భారాన్ని తగ్గిస్తుంది.
4. ధూమపానం మరియు మద్యపానం మానేయడం:
   • ధూమపానం రక్తనాళాలను దెబ్బతీస్తుంది, అధిక మద్యపానం గుండె కండరాలను బలహీనపరుస్తుంది. ఈ రెండు అలవాట్లను పూర్తిగా మానేయడం గుండె ఆరోగ్యానికి చాలా ముఖ్యం.
5. దీర్ఘకాలిక వ్యాధులను నియంత్రించడం:
   • అధిక రక్తపోటు: క్రమం తప్పని రక్తపోటు పరీక్షలు చేయించి, డాక్టర్ సూచనల ప్రకారం మందులు వాడాలి.
   • మధుమేహం: రక్తంలో చక్కెర స్థాయిలను నియంత్రించడం ద్వారా గుండె సమస్యలను నివారించవచ్చు.
   • కొలెస్ట్రాల్ స్థాయిలు: కొలెస్ట్రాల్ నియంత్రణకు మందులు వాడడం, ఆహార నియమాలు పాటించడం అవసరం.
6. ఒత్తిడి తగ్గించడం:
   • దీర్ఘకాలిక ఒత్తిడి గుండెపై భారాన్ని పెంచుతుంది. యోగా, ధ్యానం వంటివి ఒత్తిడిని తగ్గించడానికి సహాయపడతాయి.

వైద్యుడిని ఎప్పుడు సంప్రదించాలి?

గుండెకు సంబంధించిన సమస్యలకు తక్షణమే వైద్య సహాయం అవసరం. ఒకవేళ మీకు గుండె వైఫల్యం లక్షణాలు కనిపిస్తే ఆలస్యం చేయకుండా వైద్యుడిని సంప్రదించాలి. ఈ లక్షణాలు ప్రారంభ దశలో ఉన్నట్లు ఐతే తేలికపాటి మందులతో పరిస్థితి తీవ్రతరం కాకుండా నివారించవచ్చు. గుండె వైఫల్యం లక్షణాలను ముందుగా గుర్తిస్తే అకస్మాత్తుగా గుండెపోటు వచ్చే ప్రమాదాన్ని కూడా నివారించవచ్చు. యశోద హాస్పిటల్స్ కార్డియాలజిస్ట్ లు గుండె సంబంధిత సమస్యలకు అత్యుత్తమ వైద్యం అందిస్తారు. అత్యవసర పరిస్థితుల్లో హాస్పిటల్స్ కు వచ్చిన పేషేంట్లకు క్లిష్టమైన సర్జరీలు నిర్వహించి వారి ప్రాణాలు నిలబెట్టిన సందర్భాలు అనేకం ఉన్నాయి. మీరు ఏదైనా గుండె సంబంధిత సమస్యలతో బాధ పడుతుంటే లేదా ఏదైనా అత్యవసర పరిస్థితుల్లో అయినా వెంటనే యశోద వైద్య నిపుణులను సంప్రదించండి.

మీ ఆరోగ్య సంరక్షణ గురించి ఏవైనా సందేహాలు ఉన్నాయా? సహాయం చేయడానికి మేము సిద్దంగా ఉన్నాము! మా అనుభవంతులైన నిపుణుల సలహా కొరకు +918065906165 కి కాల్ చేయగలరు.