ఆనెలు సమస్యలు: లక్షణాలు, కారణాలు మరియు చికిత్స

ఆనెలు అంటే ఏమిటి?

కార్న్ ఫుట్ (Corn Foot) ను తెలుగులో ఆనెలు లేదా ఆనెకాయలు అని అంటారు. ఇది చర్మం యొక్క మందపాటి, గట్టిపడిన ప్రాంతం. ఇది సాధారణంగా పాదాలపై, ముఖ్యంగా కాలి వేళ్లపై లేదా అరికాళ్లపై అధిక ఒత్తిడి లేదా నిరంతర రాపిడి కారణంగా ఏర్పడుతుంది. ఇవి చిన్నవిగా, గుండ్రంగా ఉండి, మధ్యలో గట్టి కెరాటిన్ కోర్ (core) కలిగి ఉంటాయి. నొక్కినప్పుడు లేదా బూట్లు ధరించినప్పుడు ఇవి తీవ్రమైన నొప్పిని కలిగిస్తాయి, ఇది నడవడానికి అసౌకర్యాన్ని కలిగిస్తుంది. ఆనెలు తీవ్రమైన సమస్య కాకపోయినప్పటికీ కొంతమందిలో ఆనెల వలన తీవ్రమైన నొప్పి కలుగుతూ ఉంటుంది. ఆనెలు ఎన్ని రకాలు? వీటి లక్షణాలు ఎలా ఉంటాయి? ఈ సమస్యకు ఎలాంటి చికిత్స అందిస్తారు అనే విషయాలను ఇక్కడ వివరంగా తెలుసుకుందాం.

ఆనెలు రకాలు

ఆనెలు సాధారణంగా మూడు రకాలుగా ఉంటాయి:

• హార్డ్ కార్న్స్ (Hard Corns): ఇవి చిన్నవిగా, గట్టిగా ఉండి, మందపాటి చర్మాన్ని కలిగి ఉంటాయి. ఇవి సాధారణంగా కాలి వేళ్ల పైభాగంలో కనిపిస్తాయి.
  
• సాఫ్ట్ కార్న్స్ (Soft Corns): ఇవి మృదువుగా, రబ్బరు లాగా ఉండి, తెలుపు లేదా గోధుమ రంగులో ఉంటాయి. ఇవి సాధారణంగా కాలి వేళ్ల మధ్య, చెమట ఎక్కువగా పట్టే ప్రదేశాలలో ఏర్పడతాయి.
• సీడ్ కార్న్స్ (Seed Corns): ఇవి చాలా చిన్నవిగా, గుండ్రంగా ఉండి, సాధారణంగా పాదాల అడుగున కనిపిస్తాయి.

ఆనెలు ఏర్పడడానికి గల కారణాలు

ఆనెలు సాధారణంగా ఒకే భాగంలో ఎక్కువగా ఒత్తిడి కలగడం వలన ఏర్పడతాయి. ఉదాహరణకు మనం చెప్పులు లేకుండా ఎక్కువ దూరం నడవడం వలన అరికాళ్ళ మీద ఎక్కువగా ఒత్తిడి కలిగి ఆ భాగంలో ఆనెలు ఏర్పడతాయి. ఆనెలు ఏర్పడానికి వివిధ కారణాలు ఉన్నాయి, వాటిని ఇక్కడ వివరంగా తెలుసుకుందాం.

• ఎక్కువ సమయం నిలబడడం లేదా నడవడం : అరికాళ్లలో ఎక్కువగా ఒత్తిడి కలగడం వలన ఆనెలు ఏర్పడతాయి. ఎక్కువ దూరం నడిచినప్పుడు లేదా వేడిగా ఉన్న ఉపరితలం మీద నడిచినప్పుడు మరియు ఎక్కువసేపు నిలబడి ఉన్నప్పుడు అరికాళ్లలో ఆనెలు ఏర్పడే ప్రమాదం ఉంది.
• సరైన చెప్పులు లేదా బూట్లు లేకపోవడం : మనం ధరించే చెప్పులు లేదా బూట్లు మనకి సరిపోనప్పుడు అవి తరచుగా పాదాలను రాపిడికి గురిచేస్తాయి. ఇలాంటి సందర్భాలలో ఆ భాగంలో ఆనెలు ఏర్పడతాయి. ఈ రాపిడి ఎక్కువయ్యే కొద్దీ ఆనెలు నొప్పిని కలిగిస్తాయి. వీటితో పాటుగా సరైన సాక్సులు వేసుకోకపోవడం వలన కూడా ఆనెలు ఏర్పడతాయి.
• చెప్పులు లేకుండా నడవడం: చెప్పులు లేదా బూట్లు లేకుండా నడిచే వారిలో ఆనెలు వచ్చే ప్రమాదం ఎక్కువగా ఉంది. అరికాళ్లలోని చర్మం ఎక్కువగా రాపిడికి గురవ్వడం వలన ఆనెలు ఏర్పడతాయి.
• పాదాలు లేదా వేళ్ళ వైకల్యం: పాదాలలో మరియు వేళ్ళలో వైకల్యం ఉన్నవారికి సహజంగా పాదాల మీద ఒత్తిడి ఎక్కువగా ఉండే అవకాశం ఉంది. దీనివలన అరికాళ్లలో లేదా పాదాల పైన రాపిడి ఉండే ప్రదేశంలో ఆనెలు వచ్చే ప్రమాదం ఉంది.
• అధిక బరువులు మోయడం : మనం తరచుగా ఎక్కువ బరువు మోయడం అనేది మన కాళ్ళ మీద ఎక్కువ ఒత్తిడి కలిగేలా చేస్తుంది. దీనివలన అరికాళ్లలో ఆనెలు ఏర్పడతాయి, ఉదాహరణకు కూలి పనిచేసే వారిలో ఈ సమస్య కలిగే ప్రమాదం ఎక్కువగా ఉంటుంది.
• మధుమేహం (డయాబెటీస్) : మధుమేహం వ్యాధి ఉన్నవారిలో చర్మం అధికశాతం పొడిగా ఉంటుంది. ఇలాంటి సందర్భంలో ఏదైనా భాగంలో ఒత్తిడి తక్కువగా ఉన్నా కూడా ఆనెలు ఏర్పడే ప్రమాదం ఉంది.
• థైరాయిడ్ : థైరాయిడ్ గ్రంథిలో సమస్యలు ఉండడం వలన మన శరీరంలో హార్మోన్ల అసమతుల్యత కలగవచ్చు. మన శరీరంలో హార్మోన్ల అసమతుల్యత చర్మంపై ప్రభావం చూపిస్తుంది. దీని వలన కూడా శరీరంపై వివిధ భాగాల్లో ఆనెలు ఏర్పడవచ్చు.

ఆనెలు లక్షణాలు ఎలా ఉంటాయి?

చర్మంపై ఎక్కువగా ఒత్తిడి కలిగినప్పుడు ఆ ఒత్తిడి నుండి శరీరాన్ని కాపాడడానికి చర్మంపై అదనముగా కొన్ని పొరలు ఏర్పడతాయి. వీటి లక్షణాలు ఎలా ఉంటాయని ఇక్కడ వివరంగా తెలుసుకుందాం.

• చర్మం గట్టిపడడం : శరీరంలో ఏ భాగంలో ఐతే ఆనెలు ఏర్పడతాయో అక్కడ చర్మం గట్టిగా మారుతుంది. సాధారణంగా మన చర్మం తాకినప్పుడు మృదువుగా మరియు మెత్తగా ఉంటుంది. కానీ ఆనెలు ఏర్పడిన చోట మాత్రం గట్టిగా ఉంటుంది.
• తెలుపు లేదా ఎరుపు మచ్చలు : ఆనెలు ఏర్పడినప్పుడు అవి సాధారణ శరీరం రంగులో కాకుండా తెల్లగా ఉండవచ్చు. కొన్నిసార్లు ఈ మచ్చలు ఎరుపు రంగులో కూడా ఉండవచ్చు. కొంతమందిలో ఆనెలు మధ్య భాగంలో రంధ్రాలు ఏర్పడవచ్చు.
• చర్మంపై పొరలు ఏర్పడడం : మన చర్మంపై ఆనెలు ఏర్పడినప్పుడు అవి పొరలు పొరలుగా ఉంటాయి. అంతేకాకుండా వాటి మందం చాలా ఎక్కువగా ఉంటుంది. ఈ పొరలను తాకినప్పుడు అవి గరుకుగా అనిపిస్తాయి.
• నొప్పి తగ్గించే మందులు: సిలోస్టాజోల్ వంటి మందులు కాళ్ల నొప్పులను తగ్గించి, నడిచే సామర్థ్యాన్ని పెంచుతాయి. ఈ మందుల వలన పెరిఫెరల్ ఆర్టరీ డిసీజ్ లక్షణాల నుండి తాత్కాలిక ఉపశమనం పొందవచ్చు.

ఆనెలు సమస్యకు అందించే చికిత్స

ఆనెలు ఉన్నప్పుడు వాటి తీవ్రతను బట్టి పేషేంట్ కు చికిత్స అందిస్తారు. అత్యధిక శాతం ఈ సమస్య మందులతో నయం అవుతుంది. ఆనెలు సమస్యకు అందుబాటులో ఉన్న చికిత్స గురించి ఇక్కడ వివరంగా తెలుసుకుందాం.

• వేడినీటి చికిత్స: పాదాల మీద లేదా అరికాళ్లలో ఆనెలు ఏర్పడినప్పుడు గోరువెచ్చటి నీటిలో ఐదు నిమిషాల పాటుగా పాదాలను పెట్టడం ద్వారా ఆనెలను తగ్గించవచ్చు.
• మాయిశ్చరైజర్ : డాక్టర్ సూచించిన మాయిశ్చరైజర్ లను ఆనెలు ఏర్పడిన భాగంలో రాయడం ద్వారా ఆనెలను తగ్గించవచ్చు. ఆనెలను సులభంగా నయం చేయడానికి మాయిశ్చరైజర్లు ఎక్కువగా ఉపయోగించే చికిత్స విధానం.
• మందులు : ఆనెలు సమస్య తగ్గించడానికి వివిధ రకాలైన మందులు అందుబాటులో ఉన్నాయి. ఆనెలు తీవ్రత తక్కువగా ఉన్నప్పుడు సాధారణంగా ఈ మందుల ద్వారా నయం చేయవచ్చు. ఇవి టాబ్లెట్స్ మరియు క్రీమ్ రూపంలో ఉండవచ్చు. పేషేంట్ నొప్పి తగ్గించడానికి మరియు ఆనెలు సమస్యను తగ్గించడానికి ఇవి సహాయపడతాయి. ఆనెలు సమస్యకు సాధారణంగా సాలిసిలిక్ యాసిడ్ ను డాక్టర్లు సూచించవచ్చు.
• ప్రత్యేకమైన షూస్ : ఆనెలు తీవ్రత సాధారణంగా ఉన్నప్పుడు వాటికి ప్రత్యేకమైన చికిత్స అవసరం లేదు, కేవలం వాటి మీద ఒత్తిడి కలగకుండా జాగ్రత్తలు తీసుకోవడం ద్వారా వాటిని నయం చేసుకోవచ్చు. ఇలాంటి సందర్భాలలో ప్రత్యేకమైన ఆఫ్ లోడింగ్ షూస్ మరియు షూ ఇన్సర్ట్లు ఉపయోగించడం ద్వారా ఒత్తిడి తగ్గించవచ్చు. ఇవి కేవలం బయటకు వెళ్ళినప్పుడు మాత్రమే కాకుండా ఇంట్లో ఉన్న సమయంలో కూడా ఉపయోంచాలి.
• చర్మం కత్తిరించడం: కొన్ని సందర్భాలలో శరీరంపై ఆనెలు ఏర్పడినప్పుడు అవి నొప్పి కలిగించకపోయినా వాటి వలన అసౌకర్యంగా ఉంటుంది. చర్మంపై ఏర్పడిన ఈ పొరలు మనం సాధారణ పనులు చేసుకునే అప్పుడు అసందర్భంగా రాపిడికి గురవుతూ కొంత చికాకును కలిగించవచ్చు. ఇలాంటి సందర్భాలలో కేవలం చర్మం యొక్క పైపొర మాత్రమే తొలగించే వీలుంటే వాటిని డాక్టర్ కత్తిరిస్తారు. అయితే ఈ పద్దతిని పేషేంట్ స్వయంగా ప్రయత్నిస్తే ఇన్ఫెక్షన్ వచ్చే ప్రమాదం ఉంది కాబట్టి కేవలం డాక్టర్ ద్వారానే ఈ చికిత్స జరగాలి.
• శస్త్రచికిత్స : శరీరంపై ఏర్పడిన ఆనెలు తీవ్రత ఎక్కువగా ఉండి వాటి వలన ఎక్కువగా నొప్పి మరియు అసౌకర్యం కలుగుతుంటే సర్జరీ ద్వారా ఆనెలు తొలగిస్తారు. అయితే ఆనెలు సమస్య ఉన్నవారిలో శస్త్రచికిత్స అనేది చాలా తక్కువమందికి అవసరం అవుతుంది.

ఆనెలు నివారించడానికి తీసుకోవాల్సిన జాగ్రత్తలు

కొన్ని చిన్న చిన్న జాగ్రత్తలు తీసుకోవడం ద్వారా మన శరీరంపై ఆనెలు ఏర్పడకుండా నివారించవచ్చు. ఆ జాగ్రత్తలను ఇక్కడ వివరంగా తెలుసుకుందాం.

• సరైన పాదరక్షలు : పాదాలపై లేదా అడుగుభాగంలో ఆనెలు ఏర్పడడానికి ఎక్కువ రాపిడి కారణమవుతుంది కాబట్టి మంచి షూస్ లేదా చెప్పులు వేసుకోవడం ద్వారా ఈ రాపిడిని తగ్గించవచ్చు. దీని ద్వారా ఆనెలు ఏర్పడకుండా నివారించవచ్చు.
• బరువులు మోసే అప్పుడు జాగ్రత్త తీసుకోవడం : ఎక్కువ బరువులు మోసేవారిలో ఆనెలు ఏర్పడే ప్రమాదం ఎక్కువగా ఉంటుంది కాబట్టి ఈ బరువులు మోసే సందర్భంలో వారు దృఢమైన వస్తువులను పట్టుకునే అప్పుడు చేతిలో మెత్తగా ఉండే వస్త్రం మధ్యలో ఉంచుకోవడం ద్వారా చేతి మీద ఆనెలు రాకుండా నివారించవచ్చు. బరువులు ఎక్కువగా ఉన్న సందర్భంలో మధ్యలో చిన్న విరామాలు తీసుకోవడం ద్వారా కాళ్ళ మీద ఒత్తిడి తగ్గించవచ్చు.
• షుగర్ వ్యాధి నియంత్రణ : మధుమేహం వ్యాధి కూడా మన శరీరంపై ఆనెలు ఏర్పడడానికి కారణం అవుతుంది. అందువలన మన రక్తంలో చక్కెర స్థాయులు నియంత్రణలో ఉంచుకోవడం అవసరం.
• శరీర శుభ్రత : కొన్ని రకాలైన ఇన్ఫెక్షన్లు మరియు వైరస్లు కూడా మన శరీరంపై ఆనెలు సమస్య కలగడానికి కారణం అవుతాయి. మన శరీరాన్ని పరిశుభ్రంగా ఉంచుకోవడం ద్వారా ఇలాంటి ఇన్ఫెక్షన్లు కలగకుండా నివారించవచ్చు.

చిన్నపిల్లల్లో ఆనెలు సమస్య

సాధారణంగా యుక్తవయసులో వారికంటే పదహారు సంవత్సరాల కంటే తక్కువ వయసు కలిగిన పిల్లలు ఎక్కువగా నడవడం లేదా పరిగెత్తడం చేస్తారు. అంతేకాకుండా వివిధ రకాలైన ఆటలు ఆడుతూ ఉంటారు. ఇలాంటి సందర్భాల్లో వారు చెప్పులు ధరించకపోతే వారిలో కూడా ఆనెలు సమస్య కలిగే అవకాశం ఉంది. పిల్లలలో కూడా ఆనెలు సమస్య వలన నొప్పి కలగవచ్చు. ఒకవేళ పిల్లలు నొప్పి కలుగుతున్నట్టు చెప్తే నిర్లక్ష్యం చేయకుండా తల్లితండ్రులు డాక్టర్ ను సంప్రదించాలి.

వైద్యుడిని ఎప్పుడు సంప్రదించాలి?

ఆనెలు సమస్య కొంత వరకూ సాధారణంగానే అనిపించినా కూడా నిర్లక్ష్యం చేస్తే శస్త్రచికిత్స వరకూ వెళ్లాల్సి ఉంటుంది. ఆనెలు సమస్య ఉన్నప్పుడు నొప్పి కలుగుతున్న సందర్భంలో డాక్టర్ ను సంప్రదించడం అవసరం. ఈ సమయంలో నిర్లక్ష్యం చేస్తే ఆ భాగంలో గాయం లేదా ఆనెలు సమస్య మరింత ఎక్కువయ్యే ప్రమాదం ఉంది. ఆనెలు సాధారణంగా చిన్నవిగానే ఉంటాయి ఒకవేళ మీ శరీరం పైన ఎక్కడైనా ఆనెలు లక్షణాలతో పెద్దగా మచ్చలు కనిపిస్తే వైద్యులను సంప్రదించి సరైన చికిత్స తీసుకోవాలి.

ముగింపు

ఆనెలు అనేవి తీవ్రమైన సమస్య కాకపోయినప్పటికీ కొంతమందిలో వాటి వలన నొప్పి ఎక్కువగా ఉండవచ్చు. ఆనెలు నుండి రక్తం కారుతుంటే తక్షణం వైద్య సహాయం అవసరం. యశోద హాస్పిటల్స్ యొక్క వైద్య నిపుణులు ఈ సమస్యకు అత్యుత్తమ చికిత్స అందించగలరు. అనుభవజ్ఞులైన జనరల్ సర్జన్ మీ సమస్యను బట్టి ప్రత్యేకమైన శ్రద్ద వహిస్తూ అవసరమైన చికిత్స అందిస్తారు.

మీ ఆరోగ్య సంరక్షణ గురించి ఏవైనా సందేహాలు ఉన్నాయా? సహాయం చేయడానికి మేము సిద్దంగా ఉన్నాము! మా అనుభవంతులైన నిపుణుల సలహా కొరకు +918065906165 కి కాల్ చేయగలరు.