అథ్లెట్స్ ఫుట్ : కారణాలు, రకాలు, లక్షణాలు, చికిత్స మరియు నివారణ

అథ్లెట్స్ ఫుట్ అంటే ఏమిటి?

ఫంగల్ ఇన్ఫెక్షన్ (Fungal Infection) అంటే మన చర్మం లేదా శరీరంలోని ఏదైనా భాగానికి ఫంగస్ అనే సూక్ష్మజీవి వల్ల వచ్చే వ్యాధి. మన చుట్టూ ఉన్న గాలి, నేల మరియు చెట్లపై కూడా ఫంగస్ ఉంటుంది. చాలా ఫంగస్ రకాలు మనకు హానికరం కాదు. కానీ కొన్ని రకాలు శరీరంలో ప్రవేశించినప్పుడు లేదా చర్మంపై పెరిగినప్పుడు ఇన్ఫెక్షన్‌కు కారణమవుతాయి. అథ్లెట్స్ ఫుట్ (Athlete’s Foot) అనేది ఒక సాధారణ ఫంగల్ ఇన్ఫెక్షన్. ఇది పాదాలను, ముఖ్యంగా కాలి వేళ్ల మధ్య భాగాన్ని ప్రభావితం చేస్తుంది. దీనిని వైద్య పరిభాషలో టీనియా పెడిస్ (Tinea Pedis) అని అంటారు. ఇది ఫంగస్ వల్ల వస్తుంది, సాధారణంగా తడిగా ఉండే ప్రదేశాలలో ఈ ఫంగస్ వృద్ధి చెందుతుంది.

అథ్లెట్స్ ఫుట్ రావడానికి ప్రధాన కారణాలు:

అథ్లెట్స్ ఫుట్ అనేది ప్రధానంగా ట్రైకోఫైటాన్ (Trichophyton) అనే ఒక రకమైన ఫంగస్ వల్ల వస్తుంది. ఈ ఫంగస్ వెచ్చని, తేమతో కూడిన ప్రదేశాలలో బాగా పెరుగుతుంది. అథ్లెట్స్ ఫుట్ రావడానికి గల కారణాలను ఇక్కడ వివరంగా తెలుసుకుందాం.

• తేమతో కూడిన వాతావరణం: పాదాలు ఎక్కువ సమయం చెమటతో లేదా తడిగా ఉన్నప్పుడు ఫంగస్ వృద్ధి చెందడానికి అనువైన వాతావరణం ఏర్పడుతుంది. ఇది ముఖ్యంగా బిగుతుగా ఉండే పాదరక్షలు లేదా పత్తి కాని సాక్సులు ధరించినప్పుడు జరుగుతుంది.
• ఒకరి నుండి ఒకరికి : ఈ ఫంగస్ ఒకరి నుండి మరొకరికి వ్యాపిస్తుంది. ఒక ఇన్ఫెక్షన్ ఉన్న వ్యక్తిని నేరుగా తాకడం ద్వారా లేదా కలుషితమైన ఉపరితలాలను (ఉదాహరణకు, లాకర్ రూమ్ ఫ్లోర్, స్విమ్మింగ్ పూల్ డెక్ లేదా పబ్లిక్ షవర్స్) తాకడం ద్వారా ఇది వ్యాపిస్తుంది.
• పాదరక్షలు మరియు సాక్సులు: శుభ్రంగా లేని లేదా ఇతరుల పాదరక్షలు, సాక్సులు ధరించడం వల్ల ఫంగస్ సోకే ప్రమాదం పెరుగుతుంది. అలాగే, గాలి తగలని బూట్లు ధరించడం వల్ల పాదాలు చెమట పట్టి, ఫంగస్ పెరగడానికి అవకాశం ఎక్కువగా ఉంటుంది..
• బలహీనమైన రోగ నిరోధక శక్తి: మధుమేహం లేదా బలహీనమైన రోగ నిరోధక వ్యవస్థ ఉన్నవారిలో ఈ ఇన్ఫెక్షన్ వచ్చే ప్రమాదం ఎక్కువగా ఉంటుంది.

ఈ కారణాల వల్ల పాదాలపై ఫంగస్ పెరిగి, అథ్లెట్స్ ఫుట్ అనే ఇన్ఫెక్షన్ వస్తుంది. దీన్ని నివారించడానికి పాదాలను ఎప్పుడూ శుభ్రంగా మరియు పొడిగా ఉంచుకోవడం చాలా ముఖ్యం.

అథ్లెట్స్ ఫుట్ రకాలు

అథ్లెట్స్ ఫుట్ (Athlete’s Foot) అనేది ప్రధానంగా మూడు రకాలుగా ఉంటుంది. ఈ రకాలు ఇన్ఫెక్షన్ సోకిన ప్రాంతం మరియు దాని లక్షణాల ఆధారంగా వర్గీకరించబడ్డాయి.

1. టో వెబ్ ఇన్ఫెక్షన్ (Toe Web Infection):
   ఇది అత్యంత సాధారణ రకం. ఇది కాలి వేళ్ళ మధ్య, ముఖ్యంగా చిటికెన వేలు మరియు దాని పక్కన వేలి మధ్య భాగంలో వస్తుంది.చర్మం తెల్లగా లేదా పాలిపోయినట్లుగా మారుతుంది. చర్మం పొడిబారి, పగుళ్లు వచ్చి దురదగా ఉంటుంది. కొన్నిసార్లు చర్మం పొరలుగా ఊడిపోతుంది మరియు ఆ ప్రాంతం నుంచి చెడు వాసన వస్తుంది.
2. మొకాసిన్ ఇన్ఫెక్షన్ (Moccasin-Type Infection):
   ఈ రకం ఇన్ఫెక్షన్ పాదాల అరికాళ్ళపై మరియు పక్క భాగాలపై వస్తుంది. ఈ ఇన్ఫెక్షన్ పాదాన్ని పూర్తిగా కప్పి ఉంచుతుంది, మొకాసిన్ ఇన్ఫెక్షన్ మన పాదాల కింద భాగంలో దళసరిగా ఉంటుంది. ఇది చూడడానికి చెప్పులు ధరించినట్టు కనిపిస్తుంది. పాదాల అరికాళ్ళు, మడమ మరియు పక్క భాగాలలో చర్మం పొడిబారి, పగుళ్లు వస్తుంది. ఇది తరచుగా దురద ఉండదు. చర్మం గట్టిగా, మందంగా మారుతుంది. దీనివల్ల గోళ్ల ఫంగస్ కూడా రావచ్చు.
3. వెసిక్యులర్ ఇన్ఫెక్షన్ (Vesicular Infection):
   ఇది చాలా అరుదైన రకం. పాదం అరిభాగంలో లేదా ఇతర భాగాలలో ద్రవంతో నిండిన చిన్న చిన్న పొక్కులు (blisters) ఏర్పడతాయి. ఈ పొక్కులు చాలా నొప్పిగా ఉంటాయి.ఈ పొక్కులు పగిలితే చర్మంపై పుండ్లు ఏర్పడి, ఇన్ఫెక్షన్ మరింత తీవ్రమవుతుంది. ఈ రకం ఇన్ఫెక్షన్ సాధారణంగా బ్యాక్టీరియల్ ఇన్ఫెక్షన్‌కు కూడా దారితీయవచ్చు.

ఈ మూడు రకాల అథ్లెట్స్ ఫుట్‌లకు చికిత్స పద్ధతులు దాదాపు ఒకే విధంగా ఉంటాయి. సరైన నిర్ధారణ మరియు చికిత్స కోసం వైద్యుడిని సంప్రదించడం ముఖ్యం.

అథ్లెట్స్ ఫుట్ లక్షణాలు

ఈ ఇన్ఫెక్షన్ లక్షణాలు తేలికపాటి నుండి తీవ్రమైనవిగా ఉంటాయి మరియు పాదాల వివిధ భాగాలను ప్రభావితం చేస్తాయి. అథ్లెట్స్ ఫుట్‌ లక్షణాలు ఎలా ఉంటాయో ఇక్కడ వివరంగా తెలుసుకుందాం.

• దురద మరియు మంట: అథ్లెట్స్ ఫుట్‌ ఇన్ఫెక్షన్ ఉన్నవారిలో దురద మరియు మంట అత్యంత సాధారణంగా కనిపించే లక్షణాలు. ముఖ్యంగా కాలి వేళ్ల మధ్య, అరికాళ్లపై తీవ్రమైన దురద మరియు మంటగా అనిపిస్తుంది.
• పొడిబారిన చర్మం: అథ్లెట్స్ ఫుట్‌ ఇన్ఫెక్షన్ ఉన్నవారిలో కాలి వేళ్ల మధ్య, పాదాల పక్క భాగాలలో చర్మం పొడిగా మారి, పొరలుగా ఊడిపోతుంది.
• చర్మం ఎర్రబడటం: ఇన్ఫెక్షన్ ఏర్పడిన భాగంలో చర్మం అంతా ఎరుపు రంగులోకి మారుతుంది. కొంతమందిలో చర్మం ఊదా రంగులోకి మారవచ్చు.
• నీటి బొబ్బలు : ఫంగస్ కారణంగా ఇన్ఫెక్షన్ ఏర్పడిన ప్రదేశంలో కొన్నిసార్లు చిన్న చిన్న నీటి పొక్కులు ఏర్పడతాయి. ఈ పొక్కులు పగిలినప్పుడు నొప్పి మరియు మంట కలుగుతుంది.
• పగుళ్లు: ఇన్ఫెక్షన్ వలన చర్మం మృదువుగా కాకుండా పొడిబారిపోతుంది, దీనివలన పాదాలపై పగుళ్లు ఏర్పడి, నడిచేటప్పుడు నొప్పి కలగవచ్చు.
• దుర్వాసన : ఇన్ఫెక్షన్ సోకిన పాదాల నుంచి దుర్వాసన వచ్చే అవకాశం ఉంది. చర్మంపై ఏర్పడిన ఫంగస్ కారణంగా వాసన రావచ్చు.
• గోళ్ల ఇన్ఫెక్షన్: అథ్లెట్స్ ఫుట్ సమస్యకు చికిత్స చేయకపోతే, అది గోళ్లకు వ్యాపించి గోళ్ల ఫంగస్ కు దారితీస్తుంది. దీనివల్ల గోళ్లు పసుపు లేదా గోధుమ రంగులోకి మారి, మందంగా మరియు పెళుసుగా మారతాయి.

ఈ లక్షణాలు కనిపించినప్పుడు వెంటనే వైద్యుడిని సంప్రదించి, యాంటీఫంగల్ క్రీములు లేదా ఇతర మందులతో చికిత్స తీసుకోవడం చాలా ముఖ్యం.

 అథ్లెట్స్ ఫుట్ చికిత్స

అథ్లెట్స్ ఫుట్ చికిత్సలో యాంటీఫంగల్ మందులను ఉపయోగిస్తారు. వీటిని క్రీములు, జెల్‌లు, స్ప్రేలు లేదా టాబ్లెట్ల రూపంలో తీసుకోవచ్చు.

1. క్రీములు, లేపనాలు మరియు స్ప్రేలు: చాలా సందర్భాలలో, డాక్టర్ సలహా మేరకు యాంటీఫంగల్ క్రీములు (ఉదాహరణకు, క్లోట్రిమజోల్, మైకోనజోల్ లేదా టెర్బినాఫిన్) వాడటం ద్వారా ఇన్ఫెక్షన్ నయమవుతుంది. వీటిని ప్రభావిత ప్రాంతంలో రోజుకు ఒకటి లేదా రెండుసార్లు వాడాలి. లక్షణాలు తగ్గిన తర్వాత కూడా కొన్ని రోజుల పాటు ఈ మందులను వాడాలని వైద్యులు సిఫార్సు చేస్తారు.
2. యాంటీఫంగల్ టాబ్లెట్లు: ఇన్ఫెక్షన్ తీవ్రంగా ఉండి, ఇతర చికిత్సలు పనిచేయకపోతే, డాక్టర్ కొన్ని మందులు (ఫ్లూకోనజోల్, ఇట్రాకోనజోల్ వంటివి) సూచిస్తారు. ఇవి సాధారణంగా ఇన్ఫెక్షన్ శరీరంలోకి వ్యాపించినప్పుడు లేదా గోళ్ల ఫంగస్ ఉన్నప్పుడు ఉపయోగిస్తారు.
3. యాంటీబయాటిక్స్: అథ్లెట్స్ ఫుట్ వల్ల చర్మంపై పుండ్లు లేదా వాపులు వస్తే, డాక్టర్ యాంటీబయాటిక్స్ లేదా వాపును తగ్గించే మందులను సూచించవచ్చు.

అథ్లెట్స్ ఫుట్ నివారణ మరియు వ్యక్తిగత జాగ్రత్తలు

అథ్లెట్స్ ఫుట్ సమస్యకు చికిత్సతో పాటు, అథ్లెట్స్ ఫుట్ మళ్లీ రాకుండా ఈ క్రింది జాగ్రత్తలు పాటించడం చాలా ముఖ్యం.

• పాదాలు శుభ్రంగా మరియు పొడిగా ఉంచడం: ప్రతిరోజు పాదాలను గోరువెచ్చని నీటితో, సబ్బుతో శుభ్రం చేసి, ముఖ్యంగా కాలి వేళ్ల మధ్య భాగాన్ని బాగా పొడిగా తుడవాలి.
  శుభ్రమైన సాక్సులు: ప్రతిరోజూ శుభ్రమైన కాటన్ సాక్సులను ధరించాలి. కాటన్ సాక్సులు చెమటను పీల్చుకుని పాదాలను పొడిగా ఉంచుతాయి. దీని వలన పాదాలపై తేమ లేకుండా ఉంటుంది.
• గాలి తగిలే పాదరక్షలు: గాలి తగిలే బూట్లు ధరించడం మంచిది. పాదాలు తడిగా ఉన్నప్పుడు బూట్లు ధరించకుండా చూసుకోవాలి. దీని వలన అథ్లెట్స్ ఫుట్ ఇన్ఫెక్షన్ సమస్య రాకుండా నివారించవచ్చు.
• పబ్లిక్ ప్రదేశాలలో జాగ్రత్త: స్విమ్మింగ్ పూల్స్, జిమ్‌లు లేదా పబ్లిక్ టాయిలెట్స్ ఉపయోగించే సందర్భాలలో తప్పనిసరిగా పాదరక్షలు ధరించాలి.సాధారణంగా ఈ ప్రదేశాలలో బాక్టీరియా మరియు ఫంగస్ వ్యాపించే ప్రమాదం ఎక్కువగా ఉండవచ్చు.
• పాదరక్షల శుభ్రత: సాధారణంగా అథ్లెట్స్ ఫుట్ సమస్య ఎక్కువగా పాత పాదరక్షల వలన కూడా రావచ్చు. చెప్పులను శుభ్రం చేయడం లేదా వాటిలో యాంటీఫంగల్ పౌడర్లను వాడటం వల్ల ఫంగస్ వృద్ధిని నిరోధించవచ్చు.

ఈ చర్యలు పాటించడం ద్వారా అథ్లెట్స్ ఫుట్‌ను సమర్థవంతంగా నయం చేయడమే కాకుండా, భవిష్యత్తులో ఈ ఇన్ఫెక్షన్ రాకుండా నివారించవచ్చు.

వైద్యుడిని ఎప్పుడు సంప్రదించాలి?

పైన చెప్పిన విధంగా అథ్లెట్స్ ఫుట్ ఇన్ఫెక్షన్ లక్షణాలను గుర్తిస్తే వెంటనే వైద్యుడిని సంప్రదించి తగిన చికిత్స చేపించుకోవడం అవసరం. ఇలా ముందుగా చికిత్స చేపించుకోవడం వలన ఈ అథ్లెట్స్ ఫుట్ సమస్య సులభంగా తగ్గిపోతుంది. అయితే ఈ సమస్యను నిర్లక్ష్యం చేసేకొద్దీ ఇది మరింత తీవ్రం అవుతుంది. చాలామంది ఇలాంటి ఇన్ఫెక్షన్ గుర్తించినప్పుడు సొంత వైద్యం చేస్తుంటారు. ముఖ్యంగా ముఖం మరియు శరీరంపై వాడే టాల్కమ్ పౌడర్ ను ఈ ఇన్ఫెక్షన్ ఉన్న భాగంలో వేస్తూ ఉంటారు. దీని వలన అథ్లెట్స్ ఫుట్ సమస్య తగ్గకపోగా దురద మరియు పుండు పెద్దదయ్యే ప్రమాదం ఉంది. అంతే కాకుండా ఆ భాగం నుండి దుర్వాసన కూడా రావచ్చు. ముఖ్యంగా ఇలాంటి ఇన్ఫెక్షన్ లకు చికిత్స చేయడానికి యశోద హాస్పిటల్స్ లో అత్యుత్తమ వైద్యులు అందుబాటులో ఉన్నారు. అథ్లెట్స్ ఫుట్ సమస్యను తగ్గించడానికి మరియు తిరిగి రాకుండా నివారించడానికి యశోద వైద్య నిపుణులను సంప్రదించండి.

మీ ఆరోగ్య సంరక్షణ గురించి ఏవైనా సందేహాలు ఉన్నాయా? సహాయం చేయడానికి మేము సిద్దంగా ఉన్నాము! మా అనుభవంతులైన నిపుణుల సలహా కొరకు +918065906165 కి కాల్ చేయగలరు.