ఎగ్ ఫ్రీజింగ్ అంటే ఏమిటి? ఎప్పుడు చేయించుకోవాలి? మహిళలకు పూర్తి గైడ్

1.ఎగ్ ఫ్రీజింగ్ అంటే?

2.ఎవరికి అవసరం?

3.సరైన వయసు ఏది?

4.ఎలా జరుగుతుంది?

5.ఎగ్స్ ఎలా ఉపయోగిస్తారు?

6.ఎగ్ ఫ్రీజింగ్ ప్రయోజనాలు

7.ఖర్చు ఎంత అవుతుంది?

8.అపోహలు, వాస్తవాలు

9.ఇది గుర్తుంచుకోండి!

ప్రస్తుత కాలంలో మహిళలు చదువు, కెరీర్ మరియు వ్యక్తిగత లక్ష్యాలను చేరుకునే క్రమంలో వివాహం, పిల్లల గురించి ఆలోచించే సమయం కాస్త మారుతోంది. అయితే మన జీవనశైలి మారినా, శరీరంలోని ‘బయోలాజికల్ క్లాక్’ మాత్రం వయసుతో పాటే వేగంగా ముందుకు వెళ్తుంటుంది. ముఖ్యంగా మహిళల్లో వయసు పెరుగుతున్న కొద్దీ సహజంగానే అండాల ఉత్పత్తి మరియు వాటి నాణ్యత (Egg quality and quantity) క్రమంగా తగ్గుతుంది. మరి, సరైన సమయం వచ్చినప్పుడు పిల్లల్ని కనాలి అనుకునే మహిళల ఆశలకు పరిష్కారం ఏంటి? ఇక్కడే ఆధునిక వైద్య విజ్ఞానం అందిస్తున్న అత్యుత్తమ పరిష్కారం ‘ఎగ్ ఫ్రీజింగ్’ (Egg Freezing).

వైద్య పరిభాషలో దీనిని ‘ఊసైట్ క్రయోప్రిజర్వేషన్’ (Oocyte Cryopreservation) అని పిలుస్తారు. భవిష్యత్తులో గర్భం దాల్చడానికి వీలుగా, ప్రస్తుత వయసులో ఉన్న ఆరోగ్యకరమైన అండాలను సేకరించి, వాటిని అత్యంత శీతల ఉష్ణోగ్రతల వద్ద ల్యాబ్‌లో సురక్షితంగా భద్రపరిచే విప్లవాత్మక ప్రక్రియే ఈ ఎగ్ ఫ్రీజింగ్.
ఉన్నత చదువులు లేదా కెరీర్ పరంగా స్థిరపడాలనుకునేవారు, సరైన జీవిత భాగస్వామి కోసం ఎదురుచూస్తున్నవారు మాత్రమే కాకుండా.. క్యాన్సర్ లేదా ఇతర తీవ్రమైన ఆరోగ్య సమస్యలకు చికిత్స తీసుకోబోయే ముందు తమ సంతానోత్పత్తి సామర్థ్యాన్ని (Fertility Preservation) కాపాడుకోవాలనుకునే మహిళలకు ఇది ఒక అద్భుతమైన వరం లాంటిది.
అసలు ఈ ఎగ్ ఫ్రీజింగ్ ప్రక్రియ ఎలా జరుగుతుంది? ఏ వయసులో దీన్ని చేయించుకోవడం ఉత్తమం? ఇందులో ఉన్న దశలు మరియు ఇది ఎవరికి ఎక్కువగా ఉపయోగపడుతుంది? అనే ముఖ్యమైన విషయాలను ఈ బ్లాగ్‌లో వివరంగా తెలుసుకుందాం

ఎగ్ ఫ్రీజింగ్ అంటే?

సహజంగా మహిళల శరీరంలో ప్రతి నెలా అండాశయాల నుండి అండాలు విడుదలవుతాయి. వయసు పెరిగే కొద్దీ ఈ అండాల నాణ్యత మరియు సంఖ్య తగ్గిపోతూ ఉంటుంది. ముఖ్యంగా 35 ఏళ్ల తర్వాత ఈ క్షీణత చాలా వేగంగా ఉంటుంది.
ఎగ్ ఫ్రీజింగ్ అనేది భవిష్యత్తులో గర్భం దాల్చడం కోసం, యువ వయసులో ఉన్నప్పుడు ఆరోగ్యవంతమైన అండాలను శరీరం నుండి బయటకు తీసి, అతి శీతల ఉష్ణోగ్రతల వద్ద గడ్డకట్టించి (Freeze చేసి) ల్యాబ్‌లో సురక్షితంగా భద్రపరిచే ఒక ఆధునిక వైద్య ప్రక్రియ. ఇలా భద్రపరిచిన అండాలను సంవత్సరాల తర్వాత కూడా ఐవీఎఫ్ (IVF – In Vitro Fertilization) పద్ధతి ద్వారా ఫలదీకరణం చేసి, గర్భం దాల్చడానికి ఉపయోగించవచ్చు. దీనివల్ల మహిళలు వయసుతో సంబంధం లేకుండా, వారు మానసికంగా మరియు ఆర్థికంగా సిద్ధమైనప్పుడు తల్లి కాగలరు.

ఎగ్ ఫ్రీజింగ్ ఎవరికి అవసరం?

ఎగ్ ఫ్రీజింగ్ అనేది కేవలం కెరీర్ కోసం మాత్రమే కాదు, అనేక వైద్యపరమైన మరియు వ్యక్తిగత కారణాల వల్ల కూడా ఇది చాలా మందికి అవసరమవుతుంది. కింద పేర్కొన్న పరిస్థితులలో ఉన్నవారికి ఇది ఒక ఉత్తమ ఎంపిక:

• కెరీర్ లేదా వ్యక్తిగత లక్ష్యాలపై దృష్టి పెట్టినవారు : చదువు, కెరీర్‌లో ఉన్నత స్థాయికి చేరుకోవడం కోసం సమయం వెచ్చించే మహిళలు, పెళ్లి మరియు పిల్లల బాధ్యతను కొంతకాలం వాయిదా వేయాలనుకున్నప్పుడు ఎగ్ ఫ్రీజింగ్ ఒక భరోసానిస్తుంది. సరైన భాగస్వామి దొరకనప్పుడు, ఆందోళన చెందకుండా తమ ఆరోగ్యవంతమైన అండాలను భద్రపరచుకోవచ్చు.
• క్యాన్సర్ చికిత్సలు తీసుకుంటున్నవారు (Oncology Patients): క్యాన్సర్‌ బారిన పడిన మహిళలకు కీమోథెరపీ (Chemotherapy) లేదా రేడియోథెరపీ (Radiotherapy) ఇస్తారు. ఈ చికిత్సలలో వాడే అత్యంత శక్తివంతమైన మందులు మరియు రేడియేషన్ అండాశయాలను దెబ్బతీసే అవకాశం ఉంది, కొన్నిసార్లు ఇది సంతానలేమి వచ్చే ప్రమాదం ఉంది. అలాంటి వారు క్యాన్సర్ చికిత్స ప్రారంభించే ముందే తమ అండాలను ఫ్రీజ్ చేసుకోవడం ద్వారా భవిష్యత్తులో మాతృత్వాన్ని పొందవచ్చు. దీనిని ‘ఆంకో-ఫెర్టిలిటీ (Onco-fertility)’ అని అంటారు.
• ఎండోమెట్రియోసిస్ (Endometriosis) మరియు పీసీఓఎస్ (PCOS) బాధితులు: ఎండోమెట్రియోసిస్, అండాశయ తిత్తులు (Ovarian cysts) వంటి సమస్యలు ఉన్నవారికి సర్జరీలు చేయాల్సి రావచ్చు. ఈ క్రమంలో అండాశయాల సామర్థ్యం దెబ్బతింటుంది. అలాగే తీవ్రమైన పాలిసిస్టిక్ ఓవరీ సిండ్రోమ్ (PCOS) ఉన్నవారికి కూడా నాణ్యమైన అండాల ఉత్పత్తి కష్టమవుతుంది. వీరు ముందస్తుగా అండాలను దాచుకోవడం సురక్షితం.
• ఎర్లీ మెనోపాజ్ కుటుంబ చరిత్ర ఉన్నవారు:
  కొంతమంది మహిళలకు జన్యుపరమైన కారణాల వల్ల 40 ఏళ్ల కంటే ముందే మెనోపాజ్ (నె

లసరి ఆగిపోవడం) రావచ్చు. కుటుంబంలో తల్లికి లేదా సోదరికి ఇలాంటి చరిత్ర ఉంటే, వారు సాధ్యమైనంత త్వరగా ఎగ్ ఫ్రీజింగ్ గురించి ఆలోచించడం ఉత్తమం.

ఎగ్ ఫ్రీజింగ్ కోసం సరైన వయసు ఏది?

ఎగ్ ఫ్రీజింగ్ ప్రక్రియలో వయసు అనేది అత్యంత కీలకమైన అంశం. ఒక మహిళ పుట్టుకతోనే సుమారు 1 నుండి 2 మిలియన్ల అండాలతో జన్మిస్తుంది. యుక్తవయసు (Puberty) వచ్చే సమయానికి అవి 3,00,000 నుండి 4,00,000 వరకు పడిపోతాయి. ప్రతి నెలా ఒక అండం విడుదలవుతున్నప్పటికీ, వేలాది అండాలు సహజంగానే నశించిపోతాయి.

• 20ల వయసు (20s): జీవశాస్త్రపరంగా ఇది సంతానోత్పత్తికి అత్యుత్తమ సమయం. అండాల నాణ్యత చాలా అద్భుతంగా ఉంటుంది. భవిష్యత్తులో గర్భం దాల్చడానికి ఇవి అత్యధిక సక్సెస్ రేటును ఇస్తాయి.
• 30 నుండి 35 ఏళ్ల లోపు (Early 30s): ఎగ్ ఫ్రీజింగ్ చేయించుకోవడానికి ఇది సరైన సమయంగా వైద్యులు సూచిస్తారు. ఈ వయసులో మహిళలు తమ భవిష్యత్తు ప్రణాళికలపై ఒక స్పష్టతకు వస్తారు, అలాగే అండాల నాణ్యత కూడా సంతృప్తికరంగా ఉంటుంది.
• 35 నుండి 40 ఏళ్లు (Late 30s): 35 ఏళ్ల తర్వాత అండాల సంఖ్య మరియు నాణ్యత వేగంగా పడిపోతుంది. క్రోమోజోమ్ లోపాలు (Chromosomal abnormalities) ఉన్న అండాల శాతం పెరుగుతుంది. ఈ వయసులో ఎగ్ ఫ్రీజింగ్ చేయించుకోవచ్చు, కానీ విజయవకాశాలు కాస్త తక్కువగా ఉండొచ్చు మరియు ఎక్కువ అండాలను సేకరించాల్సి రావచ్చు.
  సారాంశంలో, “సాధ్యమైనంత త్వరగా (చిన్న వయసులోనే)” అండాలను ఫ్రీజ్ చేయడం ఎప్పుడూ ఉత్తమం.

 ఎగ్ ఫ్రీజింగ్ చేయాలనుకుంటున్నారా? సలహా కోసం మా వైద్యులను సంప్రదించండి!

ఎగ్ ఫ్రీజింగ్ ప్రక్రియ ఎలా జరుగుతుంది?

ఎగ్ ఫ్రీజింగ్ అనేది సాధారణ రక్త పరీక్ష లాంటిది కాదు, ఇది సుమారు 2 నుండి 3 వారాల పాటు సాగే ఒక సమగ్ర వైద్య ప్రక్రియ. ఇది ప్రధానంగా 4 దశల్లో జరుగుతుంది.

దశ 1: ప్రాథమిక పరీక్షలు మరియు మూల్యాంకనం (Evaluation)
ముందుగా ఫెర్టిలిటీ నిపుణులు మహిళ ప్రస్తుత ఆరోగ్య పరిస్థితిని అంచనా వేస్తారు.

• AMH టెస్ట్ (Anti-Mullerian Hormone Test): ఈ రక్త పరీక్ష ద్వారా అండాశయాలలో ఇంకా ఎన్ని అండాలు మిగిలి ఉన్నాయో (Ovarian Reserve) తెలుసుకుంటారు.
  
• పెల్విక్ అల్ట్రాసౌండ్ (Pelvic Ultrasound): అండాశయాల నిర్మాణం మరియు ఫాలికల్స్ సంఖ్యను నిర్ధారించడానికి ఈ స్కాన్ చేస్తారు.
  
• ఇన్ఫెక్షియస్ డిసీజ్ స్క్రీనింగ్: HIV, హెపటైటిస్ B, C లాంటి వైరల్ ఇన్ఫెక్షన్లు ఉన్నాయో లేదో తనిఖీ చేస్తారు.

దశ 2: ఒవేరియన్ స్టిమ్యులేషన్ (Ovarian Stimulation)
సహజంగా ప్రతి నెలా ఒకే ఒక అండం పరిపక్వం చెందుతుంది. కానీ ఎగ్ ఫ్రీజింగ్ కోసం ఒకేసారి ఎక్కువ అండాలు కావాలి. దీని కోసం నెలసరి వచ్చిన 2వ లేదా 3వ రోజు నుండి సుమారు 10-12 రోజుల పాటు హార్మోన్ ఇంజెక్షన్లు (FSH, LH) ఇస్తారు.
ఈ సమయంలో ప్రతి 2-3 రోజులకు ఒకసారి డాక్టర్ వద్దకు వెళ్లి అల్ట్రాసౌండ్ స్కాన్ మరియు రక్త పరీక్షలు చేయించుకోవాలి. అండాలు ఎంత వరకు పెరుగుతున్నాయో దీనిద్వారా మానిటర్ చేస్తారు. అండాలు సరైన సైజుకు వచ్చిన తర్వాత, వాటిని విడుదలకు సిద్ధం చేయడానికి ఫైనల్ గా ‘ట్రిగ్గర్ షాట్’ (Trigger Shot) అనే ఇంజెక్షన్ ఇస్తారు.

దశ 3: అండాల వెలికితీత (Egg Retrieval)

• ట్రిగ్గర్ షాట్ ఇచ్చిన 36 గంటల తర్వాత ఎగ్ రిట్రీవల్ ప్రక్రియ జరుగుతుంది.
• ఇది డే-కేర్ ప్రొసీజర్ (అదే రోజు ఇంటికి వెళ్ళిపోవచ్చు).
• మైల్డ్ అనస్థీషియా (మత్తు) ఇచ్చి ఈ ఆపరేషన్ చేస్తారు, కాబట్టి ఎలాంటి నొప్పి తెలియదు.
• డాక్టర్ ఒక సన్నని సూదిని యోని (Vagina) ద్వారా అండాశయాల్లోకి పంపి, అల్ట్రాసౌండ్ సహాయంతో పరిపక్వం
• చెందిన అండాలను ద్రవంతో సహా బయటకు లాగుతారు.
• ఈ మొత్తం ప్రక్రియ కేవలం 15 నుండి 20 నిమిషాల్లో పూర్తవుతుంది.

దశ 4: విట్రిఫికేషన్ (Vitrification – ఫ్రీజింగ్ ప్రక్రియ)
బయటకు తీసిన వెంటనే అండాలను ల్యాబ్‌కి పంపిస్తారు. అక్కడ ఎంబ్రియాలజిస్ట్ వాటిలో నాణ్యమైన అండాలను వేరు చేస్తారు.
పూర్వకాలంలో అండాలను నెమ్మదిగా ఫ్రీజ్ చేసేవారు (Slow freezing), దీనివల్ల అండం లోపల ఐస్ క్రిస్టల్స్ ఏర్పడి అండం దెబ్బతినేది. కానీ ఇప్పుడు విట్రిఫికేషన్ (Vitrification) అనే అత్యాధునిక ‘ఫ్లాష్-ఫ్రీజింగ్’ పద్ధతిని వాడుతున్నారు. దీనిలో అండాలను మైనస్ 196 డిగ్రీల సెల్సియస్ ఉష్ణోగ్రత (-196°C) వద్ద లిక్విడ్ నైట్రోజన్‌లో సెకన్ల వ్యవధిలో గడ్డకట్టిస్తారు. ఈ పద్ధతి వల్ల అండం లోపల మంచు స్పటికాలు ఏర్పడవు మరియు వాటి నిర్మాణం దెబ్బతినదు. ఈ అండాలను సురక్షితమైన ట్యాంకుల్లో దశాబ్దాల పాటు భద్రపరచవచ్చు.

గమనిక:

ఒకవేళ మీరు మీ అండాలను భద్రపరిచినప్పటికీ (ఎగ్ ఫ్రీజింగ్) కూడా మీకు సాధారణ పద్దతిలో ప్రెగ్నెన్సీ సాధ్యమైతే, సాధారణంగానే ఎగ్ క్వాలిటీ బావుంటే సహజ పద్దతిలోనే ప్రెగ్నెన్సీ ప్రయతించవచ్చు. ఎగ్ ఫ్రీజింగ్ ఎంచుకున్నారు కాబట్టి కచ్చితంగా అవే అండాలను ఉపయోగించి ప్రెగ్నెన్సీ పొందాలని కాదు. అది మీ నిర్ణయం మీద ఆధారపడి ఉంటుంది.

భవిష్యత్తులో ఈ అండాలను ఎలా ఉపయోగిస్తారు?

కొన్ని సంవత్సరాల తర్వాత మీరు తల్లి కావాలని నిర్ణయించుకున్నప్పుడు, భద్రపరిచిన ఆ అండాలను బయటకు తీస్తారు.

• థాయింగ్ (Thawing): గడ్డకట్టిన అండాలను జాగ్రత్తగా సాధారణ ఉష్ణోగ్రతకు తీసుకువస్తారు. విట్రిఫికేషన్ వల్ల సుమారు 90% కి పైగా అండాలు ఈ దశలో ప్రాణంతో, సురక్షితంగా బయటపడతాయి.
  
• ICSI ఫలదీకరణం (Intracytoplasmic Sperm Injection): అండం చుట్టూ ఉండే పొర ఫ్రీజింగ్ వల్ల కాస్త గట్టిపడుతుంది, కాబట్టి సాధారణ ఐవీఎఫ్ పద్ధతి కాకుండా, ICSI పద్ధతిని వాడతారు. ఈ పద్ధతిలో భాగస్వామి లేదా డోనర్ స్పెర్మ్ (వీర్యం) లోని ఒకే ఒక నాణ్యమైన కణాన్ని నేరుగా అండం లోపలికి ఇంజెక్ట్ చేస్తారు.
  
• ఎంబ్రియో ట్రాన్స్‌ఫర్ (Embryo Transfer): ఫలదీకరణ చెందిన తర్వాత అది పిండంగా (Embryo) మారుతుంది. ఆ పిండాన్ని ఐదు రోజుల పాటు ల్యాబ్‌లో పెంచి, ఆ తర్వాత మహిళ గర్భాశయంలోకి (Uterus) ప్రవేశపెడతారు. పిండం గర్భాశయానికి అతుక్కుంటే, గర్భం నిర్ధారణ అవుతుంది.

 ఎగ్ ఫ్రీజింగ్ వల్ల కలిగే ప్రయోజనాలు

• మానసిక ప్రశాంతత: ‘వయసు మించిపోతుందేమో’ అనే మానసిక ఒత్తిడి నుండి ఇది పూర్తిగా ఉపశమనం ఇస్తుంది. కెరీర్, లక్ష్యాలు మరియు సరైన భాగస్వామి ఎంపిక పట్ల స్వేచ్ఛను ఇస్తుంది.
• ఆరోగ్యకరమైన శిశువు: 35 ఏళ్లు దాటాక గర్భం దాల్చితే డౌన్ సిండ్రోమ్ (Down Syndrome) వంటి క్రోమోజోమ్ లోపాలు వచ్చే ప్రమాదం ఉంటుంది. కానీ మీరు 28 ఏళ్ల వయసులో అండాలను ఫ్రీజ్ చేసి, 38 ఏళ్ల వయసులో వాటిని ఉపయోగిస్తే, పుట్టబోయే బిడ్డకు 28 ఏళ్ల నాటి ఆరోగ్యకరమైన అండం తాలూకు ప్రయోజనాలే అందుతాయి.
• బ్యాకప్ ప్లాన్: సహజంగా గర్భం దాల్చడానికి ఇబ్బంది ఎదురైతే, ఎగ్ ఫ్రీజింగ్ అనేది అత్యుత్తమ ‘ప్లాన్-బి’ గా పనిచేస్తుంది.

ఎదురయ్యే సవాళ్లు మరియు దుష్ప్రభావాలు (Risks & Side Effects)

ఎగ్ ఫ్రీజింగ్ అనేది సురక్షితమైన ప్రక్రియ అయినప్పటికీ, ఇందులో కొన్ని సవాళ్లు కూడా ఉన్నాయి:

• OHSS (Ovarian Hyperstimulation Syndrome): హార్మోన్ ఇంజెక్షన్ల వల్ల అండాశయాలు అతిగా ప్రతిస్పందించి వాపుకి గురవుతాయి. దీనివల్ల పొత్తికడుపులో నొప్పి, వాంతులు, బరువు పెరగడం జరగవచ్చు. అయితే ఆధునిక మందుల వల్ల ఈ ముప్పు ఇప్పుడు చాలా వరకు తగ్గింది.
  
• శారీరక మరియు భావోద్వేగ మార్పులు: ఇంజెక్షన్ల వల్ల హార్మోన్ల హెచ్చుతగ్గులు జరిగి మూడ్ స్వింగ్స్, తలనొప్పి, రొమ్ముల్లో నొప్పి రావచ్చు. అండాల వెలికితీత తర్వాత ఒకటి రెండు రోజులు కాస్త రక్తస్రావం మరియు కడుపునొప్పి ఉండొచ్చు.
  
• గ్యారెంటీ లేదు: ఎగ్ ఫ్రీజింగ్ అనేది ఇన్సూరెన్స్ లాంటిదే కానీ, 100% శిశువు పుడుతుందని గ్యారెంటీ ఇవ్వలేము. అండం ఫలదీకరణ చెందకపోవడం లేదా పిండం గర్భాశయంలో నిలవకపోవడం వంటివి జరిగే అవకాశాలు ఎప్పుడూ ఉంటాయి.

ఎగ్ ఫ్రీజింగ్ కోసం ఎంత ఖర్చు అవుతుంది? (Cost of Egg Freezing in India)

భారతదేశంలో, ప్రత్యేకించి హైదరాబాద్, బెంగళూరు, చెన్నై, ముంబై మరియు విజయవాడ లాంటి టైర్-1, టైర్-2 నగరాల్లో ఎగ్ ఫ్రీజింగ్ సదుపాయాలు విరివిగా అందుబాటులో ఉన్నాయి.

• ప్రారంభ ఖర్చు: రక్త పరీక్షలు, డాక్టర్ కన్సల్టేషన్లు, అత్యంత ఖరీదైన హార్మోన్ ఇంజెక్షన్లు, రిట్రీవల్ సర్జరీ మరియు మొదటి ఏడాది ఫ్రీజింగ్ కోసం సుమారు రూ. 1,50,000 నుండి రూ. 2,00,000 వరకు ఖర్చవుతుంది.
  
• నిర్వహణ ఖర్చు (Storage fee): ఈ అండాలను ల్యాబ్‌లో లిక్విడ్ నైట్రోజన్ ట్యాంకుల్లో మెయింటైన్ చేయడానికి ప్రతి సంవత్సరం ఫ్రీజింగ్ రెన్యూవల్ ఫీజు చెల్లించాలి. ఇది సంవత్సరానికి సుమారు రూ. 15,000 నుండి రూ. 30,000 మధ్య ఉంటుంది. ఆసుపత్రి ప్రమాణాలను బట్టి ఈ ఖర్చులు మారుతాయి.

అపోహలు మరియు వాస్తవాలు (Myths vs. Facts)

అపోహ 1: ఎగ్ ఫ్రీజింగ్ వల్ల మెనోపాజ్ త్వరగా వస్తుంది లేదా అండాలు అయిపోతాయి.
వాస్తవం: ఇది అబద్ధం. ప్రతి నెలా ఒక మహిళ శరీరంలో వందలాది అండాలు మెచ్యూర్ అవ్వడానికి ప్రయత్నించి, చివరకు ఒకటే విడుదలై మిగిలినవన్నీ నశించిపోతాయి. ఎగ్ ఫ్రీజింగ్ ప్రక్రియలో డాక్టర్లు ఆ నశించిపోయే అండాలను మాత్రమే హార్మోన్ల ద్వారా వృద్ధి చేసి బయటకు తీస్తారు. కాబట్టి ఇది సహజ అండాల నిల్వను (Reserve) ఏమాత్రం తగ్గించదు.

అపోహ 2: దీనివల్ల పుట్టే పిల్లలకు ఆరోగ్య సమస్యలు వస్తాయి.
వాస్తవం: వేలాది పరిశోధనలు మరియు గణాంకాల ప్రకారం, సహజంగా పుట్టిన పిల్లలకు మరియు ఫ్రీజ్ చేసిన అండాల ద్వారా పుట్టిన పిల్లలకు ఆరోగ్యపరంగా, మానసిక ఎదుగుదల పరంగా ఎలాంటి తేడా లేదు.

అపోహ 3: ఇది 40 ఏళ్లు దాటిన వారికే ఉపయోగపడుతుంది.
వాస్తవం: కాదు. 30 ఏళ్ల లోపు అండాలను దాచుకుంటేనే అత్యుత్తమ ఫలితాలు వస్తాయి. వయసు పెరిగేకొద్దీ అండాల నాణ్యత తగ్గుతుంది కాబట్టి, ఎగ్ ఫ్రీజింగ్ అంతగా సక్సెస్ కాదు.

 నిర్ణయం తీసుకునే ముందు పరిగణించవలసిన ముఖ్య అంశాలు

• మీరు ఎగ్ ఫ్రీజింగ్ చేయించుకోవాలని నిర్ణయించుకుంటే, కింద తెలిపిన విషయాలను గమనించండి:
  సరైన క్లినిక్ ఎంపిక: ఈ ప్రక్రియ అంతా ల్యాబ్ టెక్నాలజీ (విట్రిఫికేషన్) పై ఆధారపడి ఉంటుంది. కాబట్టి అత్యాధునిక ఎంబ్రియాలజీ ల్యాబ్ ఉన్న ఫెర్టిలిటీ సెంటర్‌ను మాత్రమే ఎంచుకోండి.
• సక్సెస్ రేటు తెలుసుకోండి: మీరు వెళ్తున్న క్లినిక్‌లో ఇంతకుముందు ఫ్రీజ్ చేసిన అండాలను కరిగించి (Thaw) ఎంతమందికి విజయవంతంగా డెలివరీ చేశారో అడిగి తెలుసుకోండి. కేవలం ఫ్రీజ్ చేయడం ముఖ్యం కాదు, వాటిని తిరిగి ఉపయోగించడంలో సక్సెస్ రేటు ఉండాలి.
• ఆర్థిక ప్రణాళిక: ఇది ఖర్చుతో కూడుకున్న వ్యవహారం మరియు చాలా ఆరోగ్య బీమా (Health Insurance) కంపెనీలు ఎగ్ ఫ్రీజింగ్‌ను కవర్ చేయవు (క్యాన్సర్ లాంటి వైద్య కారణాలు ఉంటే తప్ప). కాబట్టి ముందుగానే ఫైనాన్షియల్ ప్లానింగ్ చేసుకోండి.

ఇది గుర్తుంచుకోండి!

తృత్వం అనేది ఒక అద్భుతమైన అనుభూతి, దానికి సమయం, సంసిద్ధత ఎంతో అవసరం.” ఆధునిక వైద్య విజ్ఞానం అందించిన ‘ఎగ్ ఫ్రీజింగ్’ టెక్నాలజీ మహిళలకు ఆ కాలాన్ని, స్వేచ్ఛను బహుమతిగా ఇస్తోంది. కెరీర్, ఆర్థిక స్థిరత్వం లేదా సరైన భాగస్వామి ఎంపిక కోసం సమయం తీసుకునే ప్రతి మహిళ పాలిట ఇది ఒక భరోసా.
అయితే, ఎగ్ ఫ్రీజింగ్ అనేది ఒక అద్భుతమైన అవకాశం అయినప్పటికీ, దీనికి సంబంధించిన శారీరక, మానసిక మరియు ఆర్థికపరమైన అంశాలన్నింటినీ బేరీజు వేసుకోవాలి. మీకు దీని గురించి ఏవైనా సందేహాలు ఉంటే, వెంటనే ఒక అనుభవజ్ఞుడైన ఫెర్టిలిటీ నిపుణుడిని సంప్రదించి, మీ శరీరానికి సంబంధించిన AMH పరీక్షలు చేయించుకుని, సరైన వయసులోనే సరైన నిర్ణయం తీసుకోండి.

(గమనిక: ఈ బ్లాగ్‌లో అందించిన సమాచారం కేవలం అవగాహన కోసం మాత్రమే. ఏదైనా వైద్యపరమైన నిర్ణయం తీసుకునే ముందు దయచేసి వైద్యులను సంప్రదించగలరు.)

కెరీర్, ఉన్నత చదువులు లేదా ఇతర వ్యక్తిగత కారణాలతో మాతృత్వాన్ని వాయిదా వేయాలనుకుంటే, మీ భవిష్యత్తుని సురక్షితం చేసుకోవడంలో ఏమాత్రం ఆలస్యం చేయకండి. సురక్షితమైన ఎగ్ ఫ్రీజింగ్ ప్రక్రియ మరియు అనుభవజ్ఞులైన గైనకాలజిస్ట్ సలహా కోసం వెంటనే కాల్ చేయగలరు.